მაღალი ლიმიტების რეგულარულ მოთამაშეს, ტიმ რაილის პოკერის ვარსკვლავები თაღლითობაში ადანაშაულებენ. ნიკოლას პალმამ, კიდევ ერთმა მოთამაშემ, ტვიტერზე, რაილის სიტყვიერი ბრალდება წაუყენა, რომლის მიხედვითაც უკანასკნელ WSOP-ის სერიებში მონაწილეობისთვის მან ყალბი ვაქცინაციის ბარათი გამოიყენა: "ტიმ რაილის ვაქცინა არასდროს გაუკეთებია. მან, WSOP-ზე დასასწრებად ვაქცინაციის გაყალბებული მოწმობა წარადგინა, რაც აცრილ მოთამაშეებთან მიმართებით უსამართლობა იყო".

ტიმ რაილი ნაკლებად ცნობილი, მაგრამ წარმატებული მოთამაშეა. მის ანგარიშზე $2.2 მილიონ დოლარზე მეტი მოგება ირიცხება. საქმე არა მის სათამაშო კარიერას, არამედ მის ანტივაქსერულ განცხადებებს ეხება. რაილი აქტიურად იყო ჩართული COVID-19-ის აცრის საწინააღმდეგო მოძრაობაში. ის რეგულარულად ავრცელებად მცდარ ინფორმაციას და საკუთარ თავს ისეთ სამოქალაქო აქტივისტებს ამსგავსებდა, როგორებიც როზა პარკსი და კოლინ კაპერნიკი იყვნენ. 

როცა ტვიტერის გარჩევებში დენიელ ნეგრანუ ერთვება, პოკერის გულშემატკივრებისთვის მთავარი სანახაობა იწყება. ახალი წლის ღამეს, ნეგრანუმ ტვიტი გამოაქვეყნა, სადაც ის ტიმ რაილის $10.000 დოლარიან სანაძლეოს სთავაზობდა, თუ ის სიცრუის დეტექტორის გამოყენებით გასცემდა კითხვას პასუხს, იყო თუ არა რეალურად აცრილი? "ერთ-ერთი ფუფუნება, რაც სიმდიდრეს და ბევრ ფულს ახლავს თან, ისაა, რომ მატყუარებს თავიანთ ტყუილზე შეგიძლია მიუთითო".

Jeopardy-ის ვარსკვლავმა და პოკერის ცნობილმა მოთამაშემ, ალექს ფოქსენმა რაილის მისამართით დაწყებული ბრალდებების ლოგიკა ახსნა: "რაილიმ თავისი ბარათი მაჩვენა, რომელზეც აცრის თარიღად სექტემბერია მითითებული. ნოემბერში კი, ის აცხადებდა, რომ ტურნირში მონაწილეობას ვერ მიიღებდა, რადგან ის ვაქცინირებული არ იყო." ამის შემდეგ კი, ტიმ რაილი WSOP-ის მაგიდებთან გამოჩნდა, რომელზე დასასწრებადაც ვაქცინაციის ბარათი აუცილებელი იყო.