გარდა იმისა, რომ ლექს ველდუსი მსოფლიოს ერთ-ერთ საუკეთესო ქეშ-გეიმერად ითვლება, უკანასკნელი რამდენიმე წლის განმავლობაში, მან ლაივ სტრიმერის იმიჯიც შეიქმნა, რითიც ინტერნეტ სამყაროში კიდევ უფრო დიდი პოპულარობა და პატივისცემა დაიმსახურა. ამჯერად, ველდუსი, სამხრეთ კორეაში მიმდინარე 'ტრიტონის' ჰაი როლერ სერიებს ესწრება, სადაც პუბლიკის წინაშე კომენტატორის რანგში წარსდგა. 

ლექს ველდუსი ტურნირებს ლეგენდარულ ონლაინ გრაინდერთან, რენდი nanonoko ლიუსთან ერთად უძღვება. "ვფიქრობ, ამ საქმეში ბალანსი უნდა შეინარჩუნო და ეცადო, არ გადაამლაშო, - ყვება ველდუსი, - რა თქმა უნდა, მოუმზადებლად მოსვლაც არ ვარგა, რადგან ეს უკვე აშკარად არაპროფესიონალურია. რენდის ამ საქმეში გაცილებით დიდი გამოცდილება აქვს. ამიტომ, კომენტირების დროს გამოუცდელი, დამწყები მოთამაშის როლი ავირჩიე, რომელიც თითქოს წესებში გარკვევას ცდილობს. ვფიქრობ, შორთ დექს ძალიან საინტერესო სტრატეგიული ასპექტები აქვს. თამაშის მსვლელობის დროს, მე სწორედ ამ ასპექტებს ვაჟღერებ და 'ნანონოკოს' თამაშის ტაქტიკურ ნაწილზე ვუსვამ კითხვებს, რაც უკვე საინტერესო დისკუსიას იწვევს."

მართლაც, ლექს ველდუსს აქამდე პოკერის ამ სახეობასთან შეხება არ ჰქონია. მან გასული ტურნირის სესიები ნახა და თამაშის დინამიკაზე წარმოდგენა სწორედ ასე შეიქმნა. "თუ ტურნირს ვუყურებ, უფრო მეტიც - 'ტვიჩზე' ნანახი ქეშ-გეიმებიც კი მოქმედებენ და თამაშის სურვილს მიღვიძებენ. მიუხედავად იმისა, რომ კომენტატორის ოთახში ჯდომა მიწევს, მაგიდის დინამიკას და დაძაბულობას გამუდმებით ვგრძნობ." 

როგორც ირკვევა, სამხრეთ კორეაში მიმდინარე სატურნირო სერიებში მონაწილეობის მიღებას ველდუსი არ აპირებს: "ტურნირზე მილიონი დოლარის დახარჯვა ყოველდღიური საქმე ნამდვილად არ არის. ვფიქრობ, ჯერ მსგავსი გადაწყვეტილება საკმაოდ ნაადრევია. მე ჩემს მომავალზე ვზრუნავ და მგონია, რომ ის, რასაც ამ მომენტში ვაკეთებ - თამაშის შესწავლა, განხილვა, გაანალიზება, გვერდიდან დაკვირვება, ჩემს თამაშს მნიშვნელოვნად წაადგება."