პარასკევს, 8 მაისს, მსოფლიოს უდიდესმა პოკერ რუმმა 'პოკერსტარსმა', კანადელი დენიელ ნეგრანუს შესახებ დოკუმენტური ფილმის ოფიციალური ტრეილერი გამოუშვა. ფილმის ტიზერმა დიდი აჟიოტაჟი გამოიწვია პოკერის მოყვარულთა წრეებში, თუმცა მისი გამოსვლის ოფიციალური თარიღი ჯერ კიდევ უცნობია. 

პროექტი ძალიან საინტერესო უნდა გამოდგეს, როგორც 'პოკერსტარსისთვის', ისე კანადელი მოთამაშისთვის. დენიელ ნეგრანუ ბოლო ათწლეულის ერთ-ერთი ყველაზე წარმატებული, გავლენიანი და მოთხოვნადი პოკერის მოთამაშეა, რომლის პოპულარობა სულ უფრო და უფრო იზრდება. თვის დასაწყისში, მან კონტრაქტი გააფორმა ახალ სატელევიზიო პორტალთან Poker Central, რომელიც სულ მალე დაიწყებს მაუწყებლობას. თავის მხრივ 'პოკერსტარსი' განაგრძნობს პოკერის პოპულარიზაციას საზოგადოების სხვადასხვა წრეებში, რასაც რამდენიმე დღის წინ პოკერ რუმსა და ბრაზილიელ ნეიმარს შორის გაფორმებული ხელშეკრულებაც ადასტურებს. 

დენიელ ნეგრანუს შესახებ დოკუმენტური ფილმით, 'პოკერსტარსი', პოკერის მარკეტინგში ახალ ნაბიჯს დგამს. უდიდეს ოპერატორს სურს წარმოაჩინოს წარმატებული მოთამაშის ცხოვრება და ისტორია ყოველგვარი პომპეზურობის გარეშე, შეფუთოს ნეგრანუს იმიჯი მაქსიმალურად მეინსტრიმულად და აჩვენოს პოკერის მოყვარულებს, რომ ფილმის გმირი არაფრით განსხვავდება სხვებისგან, რომ ნებისმიერს შეუძლია გახდეს წარმატებული მოთამაშე. 'პოკერსტარსის' დევიზიც სწორედ ეს არის - აღმოაჩინე ვარსკვლავი საკუთარ თავში! პუბლიკასთან მუდამ გახსნილი, ხმაურიანი და მხიარული დენიელ ნეგრანუ კი ასეთი როლისთვის საუკეთესო კანდიდატურაა. 

"ჩემთვის არაფერია განსაკუთრებული იმაში, სადაც ახლა მე ვარ, - ამბობს ფილმში ნეგრანუ, - მე ყოველთვის ვიცოდი, რაც არ უნდა გამეკეთებინა - მე წარმატებას მივაღწევდი!" ფილმში ნაჩვენებია უამრავი კადრი, რომელიც არცერთ სატელევიზიო ეთერში არ გასულა, ფრაგმენტები ნეგრანუს ცხოვრებიდან. მაყურებელი გაიგებს კანადელი სუპერვარსკვლავის კარიერის დასაწყისს სამშობლოში, როგორ ცდილობდა რუმინელი ემიგრანტების შვილი პოკერით თავის გატანას ტორონტოში. როგორ მიაღწია მან იმას, რაზეც ყველა მოთამაშე ოცნებობს - საკუთარი ქალაქის შემდეგ, თავისი ბანკროლით წარმატებას მიაღწიოს ლას ვეგასში. მისი პირველი, მტკივნეული და წარუმატებელი ნაბიჯები ვეგასის კაზინოებში.  

ფილმში უამრავი ცნობილი პოკერის ვარსკვლავი იქნება. მხოლოდ ტრეილერში ჩანან ისეთი მოთამაშეები, როგორებიც არიან: ფილ აივი, ჯენიფერ ჰერმანი, ანტონიო ესფანდიარი, ჯეისონ მერსიერი.