დენიელ ნეგრანუ პოკერის ყველაზე ცნობილი მოთამაშეა. სათამაშო ისტორიაში უამრავი დიდი ფიგურაა, რომლებსაც ნეგრანუზე დიდი დამსახურება აქვთ სპორტის ამ სახეობის განვითარებაში, მაგრამ პოკერის ინდუსტრიის გარეთ მათი სახელები უცნობია. მართალია, დენიელ ნეგრანუს ყველა ცნობს, მაგრამ ის საეჭვო პიროვნებად მიიჩნია ამერიკის ბანკმა, რომელმაც მოთამაშეს ანგარიში დაუხურა. 

"მათ ჩემი ანგარიში დახურეს, გაფრთხილებისა და გასაჩივრების შესაძლებლობის გარეშე, მიუხედავად იმისა, რომ ჩემთან არანაირი საეჭვო ტრანზაქცია არ ფიქსირდებოდა" - დაწერა ტვიტერზე ნეგრანუმ. ეს პირველი შემთხვევა არაა, როცა Kid Poker-ს ამერიკის ბანკთან პრობლემა შეექმნა: 2015 წელს, მას იგივე ბანკმა დაუხურა ექაუნთი. 

როგორც ირკვევა, მსგავსი პრობლემა არაერთ გემბლერს შექმნია. WSOP-ის მეინ ივენთის გამარჯვებულის, ჯო ჰეშემის მტკიცებით, ბანკები მსგავს მეთოდებს სავარაუდო თაღლითობის გამოსავლენად და აღსაკვეთად მიმართავენ. სამწუხაროდ, ფულის გათეთრებისთვის კრიმინალები მართლაც იყენებენ სათამაშო ინდუსტრიას, მაგრამ ამერიკის ბანკმა ნეგრანუს ანგარიში ყოველგვარი გამოძიების გარეშე გააუქმა. საქმე დიდ თანხებს ეხება: დენიელ ნეგრანუს ქონება, სულ მცირე, $50.000.000 დოლარადაა შეფასებული.