WSOP-ის ყველა დროის რეკორდსმენი, ფილ ჰელმუტი ონლაინ სერიებისთვის ემზადება. ამის შესახებ მან სარა ჰერინგის პოდკასტში ისაუბრა: "თვითიზოლაციის პერიოდი ნაყოფიერად გამოვიყენე. ამ რაოდენობის ონლაინ პოკერი არასდროს მითამაშია."

როგორც წესი, ჰელმუტი თავისი უკმაყოფილებით გამოირჩევა. ის გამუდმებით აკრიტიკებს სხვა მოთამაშეებს ცუდი გადაწყვეტილებების მიღების გამო. ამჯერად კი, ის საკმაოდ თავდაჯერებული ჩანდა. რაც მთავარია, მან ყველაზე გავრცელებული GTO სტრატეგია უარყო: "გარკვეული პერიოდი ვცადე, GTO მეთამაშა. მიზანი არა მოგება, არამედ ამ სტრატეგიით მოთამაშე ოპონენტების გაანალიზება იყო. ამ თვეების განმავლობაში, ონლაინ პოკერით იმდენი გამოვიმუშავე, რომ ვისკონსინში 4-5 სახლს ვიყიდი."

წლევანდელი WSOP განსხვავებულ ფორმატში ჩატარდება: ის მთლიანად ინტერნეტ სივრცეში იქნება, ნაწილი WSOP-ის საიტზე, ნაწილი კი - GGPoker-ის პლატფორმაზე. ტრადიციულად, ფილ ჰელმუტი ხაზს უსვამს თავის ე.წ. 'მოთამაშის წაკითხვის' უნარს, რომლის ონლაინ პოკერში გამოყენება, პრაქტიკულად, შეუძლებელია. სწორედ ამისთვის დასჭირდა მას კვირაში 6 დღე კომპიუტერთან ჯდომა და ახალი თაობის მოთამაშეებთან იმ სივრცეში დაპირისპირება, რაც მისთვის მეტ-ნაკლებად უცხოა.