რამდენიმე დღის წინ, 'ტვიტერზე' გამოქვეყნებულ პოსტში, დენიელ ქეითსმა ბოდიშის მოხდა სცადა და განმარტა, რომ მისი და ტომ დუანის გადადებულ ჰედს-აპთან დაკავშირებით ზედმეტი კრიტიკა გამოუვიდა. 

"მინდა, ტომ დუანის ამბავს შევეხო, რადგან ვხვდები, რომ სამართლიანი არ ვიყავი, - წერს ქეითსი, - ჩელენჯის პირობების დარღვევის გამო, ტომმა სოლიდური კომპენსაცია გადაიხადა. პრობლემა იმაში მდგომარეობს, რომ ის დავის სამართლებრივ გადაწყვეტაზე უარს ამბობს."

გასულ კვირას, დენიელ ქეითსმა 'ტვიტერზე' ტომ დუანს შეუტია და თქვა, რომ მისი საქციელი საოცრად არაეთიკური იყო: "მხოლოდ ჩემ მიმართ არა... მას სხვა მოთამაშეების ვალები აქვს. მაინტერესებს, სად გადის ზღვარი სამართალსა და შურისძიებას შორის?" 

ასეთი მკვეთრად ნეგატიური და აგრესიული პოსტის შემდეგ, ქეითსის მოულოდნელი დამშვიდება საკმაოდ უცნაური იყო. როგორც გაირკვა, ეს ყველაფერი მისი 'სულიერი მოგზაურობის' ბრალი იყო. დენიელ ქეითსი ინდოეთშია და ინდურ კულტურასა და, რაც მთავარია, ინდურ სამზარეულოს ეცნობა. დენიელ ქეითსი თანამედროვე პოკერის ერთ-ერთი უდიდესი სახელია, რომელიც აქტიურად თანამშრომლობს ე.წ. mindcoach-ებთან, რათა თამაშისგან მიღებული ფსიქოლოგიური სტრესი დაძლიოს.

მიუხედავად იმისა, რომ დუანთან შეწყვეტილი თამაშის გაგრძელების რეალური პერსპექტივა არ ჩანს, ფსიქოლოგიური მდგრადობა ქეითსისთვის გამოსადეგი იქნება: მალე, მას ფილ გალფონდთან მოუწევს ჰედს-აპ ჩელენჯში დაპირისპირება, რაც იღბლისა და ცოდნის გარდა, ნერვების გამოცდაც იქნება.