20 ივლისს, დენიელ ნეგრანუმ პოკერის მოთამაშეების მიერ VPN-ის გამოყენების ეთიკურობაზე წამოჭრა საკითხი. საკუთარი 'ტვიტერის' გვერდზე მან სპეციალური გამოკითხვაც მოაწყო, რომლითაც პოკერის მოთამაშეებისა და მოყვარულების აზრი უნდოდა გაეგო. გამოკითხვაში მონაწილეობა 15.918 ადამიანმა მიიღო, რომელთა 76% თვლის, რომ პოკერ-რუმის მოსატყუებლად VPN-ის გამოყენება სრულიად ნორმალური მოვლენაა და არანაირ ეთიკურ კოდექსს ის არ ეწინააღმდეგება. რა თქმა უნდა, მსგავსი ქმედება წინააღმდეგობაში მოდის აშშ-ის კანონმდებლობასთან, რომლის მიხედვითაც, უმეტეს შტატებში ონლაინ პოკერის თამაში აკრძალულია. 

VPN - Virtual Private Network სპეციალური ქსელია, რომელიც მომხმარებლებს საშუალებას აძლევს ციფრული მონაცემები ისე გაგზავნონ და მიიღონ, რომ სახელმწიფოს, ან ინტერნეტის მომწოდებელ კომპანიას მათ ვირტუალურ მისამართზე, ან ან გამოყენებულ ციფრულ მონაცემებზე წვდომა არ ჰქონდეთ. VPN-ები ხშირად გამოიყენება პოკერ-რუმების 'მოსატყუებლად', თუ პოკერ-რუმი რომელიმე კონკრეტულ ლოკაციაზე მომსახურებას არ ახორციელებს. 

საკუთარ ბლოგ-პოსტში კანადელმა მოთამაშემ კიდევ ერთი კითხვა დასვა: რატომაა VPN-ის გამოყენება ჩითინგი, ან თაღლითობა?

"რა არის თაღლითობა? - კითხულობს ნეგრანუ, - როგორ შეიძლება მოვლენა ჩაითვალოს თაღლითობად, რომლითაც არავინ ზიანდება? VPN-ის გამოყენებით არ ზარალდებიან პოკერ-რუმები, ან სხვა მოთამაშეები. ასეთი საქციელით შენ მხოლოდ მთავრობას ატყუებ, რომელმაც უსამართლოდ აუკრძალა ადამიანებს საკუთარი სახლიდან გაუსვლელად ეთამაშათ ონლაინ პოკერი."

დენიელ ნეგრანუ ცნობილმა ჟურნალისტმა, ჰეილი ჰინტზემ გააკრიტიკა: "რატომ ცდილობს პოკერის ერთ-ერთი ყველაზე ცნობილი სახე, ადამიანებს ისეთი საქციელისკენ უბიძგოს, რომელიც ნებისმიერი პოკერ-რუმის კანონმდებლობას ეწინააღმდეგება?"

ჰინტზემ ცნობილი საქმეც გაიხსენა, როდესაც VPN-ის გამოყენებით, გორდონ ვაიომ SCOOP-ზე $692.000 დოლარი მოიგო. მაშინ, PokerStars-მა მოგებული თანხის გაცემაზე უარი თქვა, რის გამოც ვაიომ კომპანიას უჩივლა. გორდონ ვაიო ამტკიცებდა, რომ თამაშის მომენტში ის კანადაში იმყოფებოდა, ხოლო მოგვიანებით საქმესთან დაკავშირებული ოფიციალური დოკუმენტები და გარკვეული მტკიცებულებები გააყალბა. "მთელი ის ტყუილები, რაც გორდონ ვაიომ იკადრა, მთელი ის თაღლითური სქემა,  რომელიც მის მიერ იყო განხორციელებული, დენიელ ნეგრანუმ არაფრად ჩააგდო" - წერს ჰეილი ჰინტზე.

საპასუხოდ, კანადელმა მოთამაშემ განაცხადა, რომ გორდონ ვაიოს შემთხვევას მის კითხვასთან არანაირი კავშირი არ აქვს, რადგანაც საქმე მხოლოდ VPN-ის გამოყენებას ეხება და არა დოკუმენტების გაყალბებასა და ტყუილებს.