მსოფლიოში ცოტა თუ მოიძებნება ისეთი, ვინც 60 წლის ასაკში პროფესიონალური პოკერითაა დაკავებული. ფრანგი ბრუნო ფიტუში სწორედ ერთ-ერთი ასეთი მოთამაშეა, რომლის ანგარიშზეც ლაივ ტურნირებზე მოგებული $3.000.000 დოლარია.  გარდა იმისა, რომ ფიტუში PartyPoker-ის წარმომადგენელია, ის World Heads-up Poker Championship-ის ტიტულსაც ფლობს. ბრუნო ფიტუში მრავალფეროვანი ინტერესების ადამიანია, რაც მას სხვა რობოტს მიმსგავსებული მოთამაშეებიდან გამოარჩევს. ონლაინ გამოცემა HighStakesDB პარიზელ მოთამაშეს შეხვდა და პოკერის ძველ და ახალ ტრენდებზე ესაუბრა. ჩვენ სწორედ ამ ინტერვიუს გთავაზობთ:

ფრანგულ პოკერში ერთ-ერთი ყველაზე ცნობადი სახე ხარ. პოკერის წრეების გარეთ თუ გცნობენ?

საბედნიეროდ, ვეღარ მცნობენ. იყო დრო, როცა ქუჩაში მაჩერბედნენ, რადგან მაშინ პოკერზე სატელევიზიო შოუ მიმყავდა. 

შენ პოკერის ისეთ ლეგენდებთან გითამაშია, როგორებიც ამარილო სლიმი, დოილ ბრანსონი და ფილ აივი არიან. რა განსხვავებაა ძველ და ახალ თაობას შორის?

განსხვავება, ერთდროულად, დიდიცაა და უმნიშვნელოც. დიდი განსხვავება არ არის იმ გაგებით, რომ ორივე შემთხვევაში საქმე ფულს, ცხოვრების მდიდრულ სტილს, ინტელექტს და აზარტს ეხება. მაგრამ თაობებს შორის აშკარა სხვაობას დაინახავთ, რადგან დრო შეიცვალა, თამაში მეტად რთული გახდა, ახალი რეგულაციები დაწესდა, პოკერის ეტიკეთიც ახლებურად ესმით... 

რამე განსაკუთრებული ისტორია თუ გახსენდება 'ძველი დღეებიდან'?

ერთხელ, WSOP-ის მსვლელობისას, კაზინო Rio-ში ამარილო სლიმმა და დოილ ბრანსონმა თავიანთი ელექტრო სავარძლებით რბოლა მოაწყვეს. არ ვიცი, რამდენი ჰქონდათ დადებული, მაგრამ ხალხი დიდი მონდომებით ამხნევებდა. ასევე, მახსოვს DevilFish (დეივ ულიოტი), ჩვენს Aviation Club de France-ში, ერთ-ერთი ტურნირის შესვენებისას რომ როიალზე უკრავდა და მღეროდა. 

WSOP-ის ოქროს სამაჯურს რამდენჯერმე მიუახლოვდი. როგორ ფიქრობ, კვლავ შეგიძლია ოქროს სამაჯურის მოგება?

2001-ში ჰედს-აპის ჩემპიონატი მოვიგე; ამის შემდეგ 3-ჯერ მივაღწიე WSOP-ის ფინალურ ჰედს-აპს და ერთხელაც ვერ მოვიგე. მგონი, ეს ორი მოვლენა ერთმანეთთან შეუსაბამობაშია. ისიც უნდა ვთქვა, რომ WSOP-ზე 10 ტურნირზე მეტს არ ვთამაშობ.

პოკერის გარდა, უამრავი ინტერესი გაქვს. სხვა ჰობი თუ გეხმარება თამაშის სირთულეების გადატანაში? პოკერიდან წასვლაზე და ძალების სხვა სფეროში მოსინჯვაზე თუ გიფიქრია?

პროფესიონალური პოკერიდან დიდი ხნის წინ წავედი. ახლა, თამაში გარემოზეა დამოკიდებული. მე კარგი კაზინოები მომწონს, საუკეთესო მომსახურებით. მაგიდასთან ძლიერი მოთამაშეები უნდა ისხდნენ. ასე გაცილებით ვერთობი, ვიდრე უინტერესო თამაშში ჩართულობით, რომელიც სამსახურს უფრო ჰგავს.

შენ საკონსულტაციო კომპანიას ფლობ. ასეთი ბიზნესის წარმოება პოკერის თამაშზე ადვილია?

ორივე შემთხვევაში, მოქნილი და გამჭრიახი უნდა იყო. ორივე საქმე პრაგმატულობას, შრომისმოყვარეობას, მოთმინებას და გრძელვადიან გეგმებზე ორიენტირებას მოითხოვს. 

მუსიკა შენი ცხოვრების დიდი ნაწილია. ვის გამოარჩევდი თანამედროვე მუსიკაში?

ჩემი მუსიკალური გემოვნება ძალიან მრავალფეროვანია. ჩემს ფლეილისტში ნახავთ დევიდ ბოუის, Pink Floyd-ს, ედი დე პრეტოს, ჟულიენ დორესა და Arcade Fire-ს. 

შარშან 60 წელი შეგისრულდა, მაგრამ გაცილებით ახალგაზრდულად ცხოვრობ და გამოიყურები. როგორ ახერხებ?

მადლობა! ალბათ, საქმე ჩემს გენეტიკაში უნდა იყოს. მაგრამ ისიცაა, რომ მე ძალიან ბევრი მძინავს.