ტომ დუანის ნახვა პოკერის ტურნირებზე, პრაქტიკულად, შეუძლებელია. მან გამოტოვა მიმდინარე წლის WSOP-ის ივენთების უდიდესი ნაწილი, ის არ ჩანს როზვადოვში ჩატარებულ ტურნირებზე, ის არ ესწრება სხვადასხვა ჰაი როლერ ივენთებს, სადაც მილიონობით დოლარი თამაშდება... სამაგიეროდ, სამხრეთ კორეაში გამართულ Triton Series-ზე დუანს არცერთი ღონისძიება არ ჩაუგდია. PokerNews-ის ჟურნალისტმა სცადა გაერკვია, რატომ ამჯობინებდა ლეგენდარული მოთამაშე სამხრეთ კორეულ სერიებს ყველა დანარჩენ დიდ სატურნირო ღონისძიებას? 

"ისინი (Triton-ის ტურნირებზე) დასტიდან 2-იანებს, 3-იანებს, 4-იანებსა და 5-იანებს იღებენ. ამას სხვა არავინ აკეთებს, - ასეთი პასუხი გასცა დუანმა ჟურნალისტის შეკითხვას მის 'ტრიტონზე' გააქტიურების შესახებ, - მონტენეგროში ჩატარებულ 'ტრიტონის' სერიებზე მე ტრადიციულ, სრულდასტიან ჰოლდემსაც ვთამაშობ. ამ ზაფხულს, 'ბელაჯიოში' ნათამაშებ რამდენიმე ტურნირზე... ადამიანები, უბრალოდ, გაშტერდებიან და ეს საქმე სრულიად ახალ დონეზე აყავთ. ვიცი, რომ იგივე მეც გამიკეთებია High Stakes Poker-ის ეთერების დროს, მაგრამ ასე მხოლოდ იმ შემთხვევაში ვიქცეოდი, როცა ბანკში 100 ბიგ ბლაინდი იყო, ან ნაგავი ხელით დიდი ბლეფის გაკეთებაზე ვფიქრობდი. ახლა კი, ვფიქრობ, რომ ადამიანები მსგავს მოქმედებას ხშირად მიმართავენ, რაც გართობას და თამაშს ნამდვილად ხელს უშლის." 

დუანის ამ მოსაზრებას ანტონიო ესფანდიარი და ჯასტინ ბონომოც დაეთანხმნენ. "ადამიანზე მიშტერება ბევრ კულტურაში უზრდელობად ითვლება, - წერს 'ტვიტერზე' ბონომო, - პოკერში კი ასეთი საქციელი მოყვარულ და დამწყებ მოთამაშეებს აშინებს და მაგიდიდან გაქცევისკენ უბიძგებს."

როგორც დუანი ყვება, Triton-ზე გაცილებით მეტ მოყვარული მოთამაშის ნახვაა შესაძლებელი მაშინ, როდესაც სხვა ტურნირები პროფესიონალებით კომპლექტდება: "აქ გაცილებით ჯანსაღი და მეგობრული სიტუაციაა. აქ ფიქრისთვის დიდ დროს მაშინ იყენებენ, როცა მართლა დიდი გადაწყვეტილებაა მისაღები."

დუანი პოკერის სპორტად ქცევას სკეპტიკურად უყურებს: "პოკერს ყოველთვის ისე ვუდგებოდი, როგორც თამაშს და არა როგორც სპორტს. სპორტში, ადამიანები რამდენიმე მილს გარბიან, ან ფეხბურთს თამაშობენ. პოკერში გაცილებით მეგობრული და კომფორტული ატმოსფერო უნდა იყოს."

კითხვაზე, რომელი მოთამაშე ახსენებს მის ახალგაზრდობას და აგრესიულობას, დუანმა ასე უპასუხა: "ყველა! ყველა ძალიან აგრესიულია. პოკერი რთულდება, მაგრამ თუ თამაშისადმი ახალ მიდგომებს, მის ახალ სვლებს გამოიგონებ, პოკერი კიდევ უფრო განვითარდება. "