უკვე დიდი ხანია, რაც ბრინ კენი თანამედროვე პოკერის ერთ-ერთ საუკეთესო წარმომადგენლად ითვლება. 2017 წლის GPI-ის რეიტინგში, $8.5 მილიონიანი წლიური მოგებით, ის პირველ ადგილს იკავებდა. როგორც თავად ამბობს, მისია ჯერ კიდევ არ შეუსრულებია და დიდების მწვერვალისკენ კიდევ დიდი გზა აქვს გასავლელი. 

"ნომერ პირველი ყველა დროის შემოსავლიან მოთამაშეებს შორის! - ამბობს მომავალ მიზნებზე კენი, - მომწონს, საოცრად ვერთობი! მომწონს, როცა მსოფლიოს გარშემო პოკერის გამო მიწევს მოგზაურობა, როცა კარგ სასტუმროებში ვჩერდები, როცა ყველაზე ძვირადღირებულ ტურნირებს საუკეთესო ტვინების წინააღმდეგ ვთამაშობ. რა თქმა უნდა, ფული კარგია, მაგრამ თამაშის დროს ამ ფაქტორს ყურადღებას არ ვაქცევ. იმდენი ფული მაქვს, რომ კარგად ვიცხოვრო და საკუთარ ოჯახს დავეხმარო. ამის შემდეგ, პოკერი ნამდვილ გასართობად იქცევა."

მის მიზანს დიდი საფრთხე შეექმნა, როდესაც ჯასტინ ბონომომ ფანტასტიკური წელი აჩვენა და კენი შორს ჩამოიტოვა. ამჟამად ბრინ კენი,  $24 მილიონ დოლარიანი მოგებით, ყველაზე შემოსავლიან მოთამაშეთა შორის, მე-9 ადგილზეა. დიდი ხნის განმავლობაში, კენი საკუთარ თავს პოკერის საუკეთესო მოთამაშედ თვლიდა. უნდა ითქვას, მისი თვითშეფასება დღემდე არ დაწეულა. "საკუთარ თავზე ყოველთვის გავაკეთებ ფსონს. რა თქმა უნდა, არსებობენ ძალიან კარგი მოთამაშეები, როგორებიც სტივენ ჩედვიკი, სემ გრინვუდი, ან თუნდაც მიკიტა ბადიაკოვსკი არიან, მაგრამ საკუთარ შესაძლებლობებში ყოველთვის დარწმუნებული ვარ."

მართლაც, ბრინ კენი იმდენადაა დარწმუნებული საკუთარ თავში და შესაძლებლობებში, რომ მათი გაზიარების ეშინია კიდეც. "სიმართლე გითხრათ, პოკერის სამყაროში მარტოხელა მგელივით ვგრძნობ თავს. ყველას ჰყავს მეგობარი, ვისთანაც დაგირებებს განიხილავენ, სკაიპებში და სხვა მესენჯერებში ჯგუფებს აკეთებენ, სადაც თამაშებს აანალიზებენ, ჩარტებს უყურებენ, მთელი დღე სტრატეგიებს განიხილავენ. მე კი თამაშის ჩემი სტილი მაქვს, პოკერის ჩემს ვერსიას ვთამაშობ."