სანამ მსოფლიოს ყურადღება ლას ვეგასში მიმდინარე WSOP-ის საზაფხულო სერიებისკენაა მიმართული, ჰაი სტეიკს რეგულარები დროს არ კარგავენ და კაზინო Bellagio-ში არსებულ Bobby's Room-ში იკრიბებიან, სადაც დასავლეთ ნახევარსფეროში ყველაზე ძვირადღირებული თამაშები იმართება. 

"ჩვენ 'ბობის რუმში' ვართ, - ყვება ვიდეო მიმართვაში გას ჰენსენი, - ჩემ წინ ტურნირების ექსტრაორდინალური მოთამაშე, დენიელ ნეგრანუ ზის. იმედია, დღეს გამიმართლებს! არაჩვეულებრივი ზაფხული გველოდება." როგორც ჰენსენის 'ინსტაგრამიდან' ირკვევა, ლეგენდარული მოთამაშეები კიდევ ერთხელ დაუპირისპირდნენ ერთმანეთს. რა თქმა უნდა, ოთახში მიმდინარე თამაშის მსვლელობისა და შედეგების შესახებ ნებისმიერი ინფორმაცია მკაცრად გასაიდუმლოებულია. 

თავად დენიელ ნეგრანუს პოსტიდან შეგვიძლია გავიგოთ, რომ პოტ ლიმიტ ომაჰას სესიაზე ის $300.000 დოლარიანი სტეკით მივიდა. უცნობია, რა შედეგს მიაღწიეს ერთმანეთის წინააღმდეგ 'მოსისხლე მტრებმა'. ყველას ემახსოვრება სატელევიზიო გადაცემა High Stakes Poker-ში გათამაშებული დარიგება, სადაც ჰენსენმა ნეგრანუს წინააღმდეგ ნახევარ მილიონ დოლარზე მეტი მოიგო. შეიძლება ითქვას, რომ ამ გათამაშებამ მნიშვნელოვანი ცვლილება მოუტანა პოკერის სამყაროს. ვიდეოს ყოველი კოპიო არნახული პოპულარობით სარგებლობდა და პოკერის ისტორიაში ერთ-ერთ ყველაზე განხილვად დარიგებად იქცა. 

დენიელ ნეგრანუმ საკუთარი 'ტვიტერის' გვერდზე ვიდეო ატვირთა, სადაც ჰენსენის გარდა, ბრაიან რასტი ჩანს - თანამედროვე ჰაი როლერ ტურნირების ერთ-ერთი გამორჩეული სახე და ძვირადღირებული ქეშ-გეიმების რეგულარი. მაგიდასთან ასევე იმყოფება დენიელ ქეითსი - კიდევ ერთი ჰაი სტეიკს გრაინდერი. ვიდეოში ჰენსენი ნეგრანუს განადგურებითა და სტეკის მისაკუთრებით ემუქრება. ძველი მეგობრები დიდი ხანია ქეშ-გეიმ მაგიდასთან აღარავის უნახავს.