მართალია, ბოლო წლებში ფილ აივი პოკერის დიდი სცენიდან თითქმის სრულიად გაქრა, მაგრამ მისი ოსტატობა ჯერ კიდევ ადგილზეა. უკანასკნელი ტურნირის მსვლელობისას, მთავარი კითხვა, რომელიც კულისებში ტრიალებდა, სწორედ სასამართლო პროცესებისგან გადაღლილ და პოკერის სატურნირო მაგიდებს მოშორებულ აივის შეეხებოდა. 

პოკერის ლეგენდამ მონტენეგროში გამართული Triton-ის სერიებზე $604.977 დოლარი მოიგო. უკანასკნელი 3 წლის განმავლობაში, აივიმ მე-3-ჯერ მოახერხა დიდ ტურნირზე ფულში შესვლა, მაგრამ ისიც უნდა ითქვას, რომ ამ ანაზღაურებების საერთო ღირებულებამ $3.000.000 დოლარი შეადგინა. 

როგორც WSOP-ის 10 ოქროს სამაჯურის მფლობელი ამბობს, მიმდინარე წლის ზაფხულში, ის ლას ვეგასში გააქტიურებას გეგმავს. 

Short Deck ივენთი, რომელიც აივიმ მოიგო, პოკერის შემდეგ სახეობას გულისხმობს: 52-ის ნაცვლად, თამაშში 36 კარტი გამოიყენება. ამოღებულია ყველა კარტი 2-დან 5-ის ჩათვლით. Short Deck-ის პოპულარობა დღითიდღე იზრდება და, როგორც ჩანს, ფილ აივიც დროს უწყობს ფეხს. ფინალურ ჰედს-აპში მან პოკერის კიდევ ერთი დიდი სახე - დენიელ Jungleman12 ქეითსი დაამარცხა. 

ტურნირზე 61 მოთამაშე დარეგისტრირდა, რომელთა შორისაც ტომ დუანი, ჯეისონ კუნი და ჩინური პოკერის დიდი სახელი, აზიური ჰაი როლერ ქეშ-გეიმების რეგულარი - პოლ ფუა იყვნენ. "შეგრძნება მართლაც კარგია, - ამბობს აივი, - ზაფხულში გაცილებით მეტ ტურნირზე თამაშს ვგეგმავ და იმედია, საპრიზო ფონდიც გაცილებით მიმზიდველი იქნება."