ე.წ. 'სტეიკინგი' პოკერის სამყაროში ჩვეულებრივ მოვლენად იქცა. იღბლის ფაქტორის შესამცირებლად, მოთამაშეები ხშირად ყიდიან საკუთარ თამაშს - სხვანაირად რომ ვთქვათ, მოთამაშეები სპონსორებს ეძებენ და მოგების შემთხვევაში ფულს წინასწარ დადგენილი პროპორციით იყოფენ. კანადელი მოთამაშე, მაიკ მაკდონალდი პირველი იყო, ვინც მსგავსი მომსახურება ინტერნეტ სივრცეში გადაიტანა და PokerShares გააკეთა - საიტი, სადაც პოკერის მოთამაშეები და სპონსორები ერთმანეთს უკავშირდებიან. 

PokerShares-ის ერთ-ერთი პირველი კლიენტი 57 წლის მაურინ მაკკარტი იყო. მისი შემთხვევა აშკარა მაგალითია იმისა, რომ პოკერის მოთამაშეში ფულის დაბანდება ნამდვილად ღირს. ჯეისონ სომერვილის Twitch-ის არხის მეშვეობით, მაურინ მაკკარტი Daily Fantasy Sports-ს გაეცნო. მოგვიანებით, მისმა აზარტულმა ჟინმა გამოვლინება სწორედ პოკერში ჰპოვა. 57 წლის კანადელი, ამჟამად, ონლაინ სივრცეში MoMac630-ით არის ცნობილი, თუმცა, სამხრეთ ონტარიოში, პოკერის მოყვარულები მაკკარტის თავისი საფირმო ღიმილით ცნობენ. 

"Twitch'-ის ჩატში ყველა 'ბიჭოს' მეძახის, სინამდვილეში კი მე 57 წლის ქალი ვარ. წელს პენსიაზე გავედი; კანადაში, ჰამილტონში საკუთარი სახლი გავყიდე, საკუთარი ნივთები სრულად გავეცი, რაც მანქანაში ჩამეტია თან წამოვიღე. გადავწყვიტე, ნიუ ბრუნსვიკში, მდინარის პირას სახლი მეყიდა და იქ ჩემს ძაღლთან ერთად დავსახლებულიყავი."

პოკერის სიყვარული ჯეისონ სომერვილის Twitch-ის არხამდე კარგა ხნით ადრე, 2003 წელს დაიწყო. ისე, როგორც მრავალი მოთამაშე, მაკკარტიც კრის მანიმეიკერით მოიხიბლა: "პოკერით 2003 წელს მოვიხიბლე, როდესაც კრის მანიმეიკერმა WSOP-ის მეინ ივენთი მოიგო. თუმცა, თამაში მხოლოდ 2009 წელს დავიწყე. 2013 წელს WSOP Seniors Tournament-ზე ვითამაშე და ფულში შესვლაც მოვახერხე. სწორედ მაშინ შევხვდი კრის მანიმეიკერს პირადად."

რა თქმა უნდა, ყველაფერი ასეთი ადვილი არ ყოფილა: "PokerStars-ზე თამაშის პირველ დღეებში საუკეთესო შედეგით ნამდვილად ვერ დავიკვეხნი. პენსიაზე გასვლა თამაშის დახვეწაში დამეხმარა - მივხვდი, რომ უსაქმურობა მოსაბეზრებელი იყო, თანაც პოკერი კარგ შემოსავალს იძლეოდა და გადავწყვიტე, რომ თამაშს სერიოზულად უნდა მივდგომოდი." ამჟამად მაურინ მაკკარტი არამხოლოდ პოკერს თამაშობს, არამედ PokerShare-ზე პროფესიონალი გემბლერების თამაშებს ყიდულობს. ერთ-ერთი პირველი თამაში, რომელშიც მაკკარტიმ ინვესტიცია განახორციელა, ლექს ვალდუსის მიერ ნათამაშები სატურნირო სერია იყო. მაშინ კანადელმა €1.200 ევრო მოიგო. მაკკარტის ერთ-ერთი უკანასკნელი მოგება, რომელიც 19 თებერვალს შედგა, €31 ევროიანი ბეთი იყო - ამ თანხით მან €4.000 ევრო მოიგო.