ცოტა ხნის წინ, ონლაინ პოკერის ლეგენდამ, ფილ გალფონდმა პოკერის ონლაინ ოპერატორების მიერ გაზრდილი საკომისიოს შესახებ ბლოგ-პოსტი გამოაქვეყნა, რომელშიც რეიკის გარდა, ონლაინ პოკერის მომავალზეც ისაუბრა. 

როგორც ლეგენდარული მოთამაშე წერს, გაზრდილი საკომისიოს წინააღმდეგ ბრძოლაში ჩართვას ის ერთი წლის წინ აპირებდა, მაგრამ თავი შეიკავა, რაც მალევე ინანა. მას შემდეგ კი, რაც რეიკის თემა კვლავ აქტუალური გახდა, მან პრობლემის მისეულ ხედვასა და ანალიზს ვრცელი პოსტი მიუძღვნა. 

ბლოგ-პოსტში გალფონდი კანადელი მოთამაშის, PokerStars-ის სახის, დენიელ ნეგრანუს განცხადებას ეხმაურება, რომლის მიხედვითაც კანადელი გაზრდილ საკომისიოს დადებითად შეხვდა. გალფონდის აზრით, ნეგრანუ და PokerStars-ის თავკაცობა პოკერ-რუმის კაზინოდ გადაქცევას გეგმავენ, რომელსაც პოკერის თემატიკა ექნება აღებული - აქ მოყვარული მოთამაშეები მაღალი რეიკის პირობებში ითამაშებენ, ხოლო პოკერის ენთუზიასტებს, რეგულარებს და პროფესიონალებს სხვაგან გადაბარგება მოუწევთ. სავარაუდო ლოკაციებად, სადაც მოთამაშეებს გადასვლა მოუხდებათ, გალფონდი PartyPoker-ს ან საკუთარ მომავალ საიტს - Run It Onces-ს ხედავს. 

"თუ Amaya ფიქრობს, რომ მათ რეგულარულ და მნიშვნელოვან მომხმარებლებს დაუმარცხებელ თამაშებში მონაწილეობა სურთ, სადაც მოგების მიღება შეუძლებელია - ეს მათი უფლებაა. თუ ისინი ფიქრობენ, რომ კონკურენტი პოკერ-რუმები გაზრდილი საკომისიოს გარეშე ჩავარდნისთვის არიან განწირულები - ესეც მათი უფლებაა" - წერს პოსტში გალფონდი.