პოლკისა და ნეგრანუს დაპირისპირება დიდ სიახლეს აღარ წარმოადგენს - თანამედროვე პოკერის ერთ-ერთი საუკეთესო ჰედს-აპ სპეციალისტი, დაგ პოლკი, თავის გადაცემებში, დენიელ ნეგრანუს ხშირად უპირისპირდება და, საკმაოდ არგუმენტირებულად, კრიტიკის ქარ-ცეცხლში ატარებს. 

PokerStars-ზე საკომისიოს მომატებას მოთამაშეების უმეტესობა ნეგატიურად შეხვდა. გამონაკლისი არც პოლკი ყოფილა. ამ მოვლენაზე კი კანადელმა პროფესიონალმა, რომელიც უკვე წლებია, რაც PokerStars-ის სახედ ითვლება, სულ სხვანაირი კომენტარი გააკეთა: ნეგრანუს განმარტებით, გაზრდილი საკომისიო მოთამაშეებისთვის, კერძოდ კი დამწყები მოთამაშეებისთვისაა სასარგებლო, რადგანაც გაზრდილი შემოსავლით პოკერ-რუმს დამატებითი ეკო-სისტემისა და წამახალისებელი ტურნირების შექმნა შეუძლია. 

კანადელის მსგავსი განცხადების შემდეგ, დაგ პოლკმა ნეგრანუს 'პოკერის სირცხვილი' და 'პატარა ძუკნა' უწოდა. "არ მგონია, პოლკი პოკერისთვის კარგი ფიგურა იყოს, - ამბობს ნეგრანუ, - სხვების ლანძღვით ის დრამატული ისტორიის შექმნას და საკუთარი 'იუთუბის' არხის პოპულარიზაციას ცდილობს. ის ხან მე მლანძღავს, ხან ჯეისონ მერსიერს, ხანაც ბენ ტოლერენს." ბრალდებებისა და კრიტიკის მიუხედავად, PokerStars-ის გაზრდილ საკომისიოსთან დაკავშირებით ნეგრანუს აზრი არ შეუცვლია. ერთადერთი რამ, რაც მას ადარდებს, ის ფაქტია, რომ American Poker Award-ის წლევანდელ დაჯილდოებაზე, დაგ პოლკი პოკერის ყველაზე გავლენიანი ადამიანის კატეგორიაშია ნომინირებული.