WPT-ის ტურნირებზე მაიკ ლის წარმატება კვლავაც გრძელდება - უკანასკნელი 5 წლის განმავლობაში, მაიკ ლიმ მე-4 WPT Fallsview მოიგო. ამჯერად, კანადელი მოთამაშე საკმაოდ უცნაურ სიტუაციაში აღმოჩნდა: ტურნირის მოგება ე.წ. ჩიპ დამპინგით მოახერხა, რამაც პოკერის სამყაროში დიდი აჟიოტაჟი და უკმაყოფილება გამოიწვია. 

ჩიპ დამპინგის კლასიკური განმარტება ასეთია: მოთამაშე მიზანმიმართულად აგებს დარიგებას, ჩიპების ან ფულის მოწინააღმდეგისთვის გადაცემის მიზნით. მეთოდი აქტიურად გამოიყენებოდა ქართულ პოკერ-რუმებშიც, რაც წლების განმავლობაში არაკონტროლირებადი იყო. საქართველოს შემთხვევაში, მსგავსი ქმედება გამოწვეულია იმ ფაქტით, რომ ჩიპ დამპინგი ექაუნთებსა ან მოთამაშეებს შორის ფულის გადარიცხვის ერთადერთ საშუალებას წარმოადგენს. 

WPT Fallsview ტურნირზე, სადაც ფინალური ჰედს-აპი მაიკ ლიმ ანდერდოგის პოზიციით დაიწყო, კულისებსმიღმა გამართული მოლაპარაკების შემდეგ, თამაში უცნაური ხაზით გაგრძელდა: ლის თანამემამულემ, კანადელმა პროფესიონალმა რაიან იუმ 4 მილიონიანი რეიზი გააკეთა, ხოლო მაიკ ლის 4.69 მილიონიან რირეიზზე კარტი გადაყარა. მსგავსი ქმედება რამდენჯერმე მოხდა, რამაც საბოლოოდ მაიკ ლის გამარჯვება გამოიწვია.

მაიკ ლის ქმედებასაც, ქართული პოკერ-რუმების მსგავსად, არგუმენტირებული განმარტება ჰქონდა: WPT, სხვა მასშტაბური ტურნირებისგან განსხვავებით, როგორიცაა EPT, ან WSOP, ტურნირის ფინალისტებს შეთანხმებების, ადგილების გადანაწილების, ან ფულის გაყოფის საშუალებას ოფიციალურად არ აძლევს. მაიკ ლი, მიუხედავად იმისა, რომ ანდერდოგის სტატუსით იყო, ორთაბრძოლის ფავორიტად რჩებოდა. მოთამაშეებმა ჩიპების რაოდენობა ე.წ. ICM-ის მიხედვით გადაინაწილეს, რაც ანდერდოგს განსაკუთრებულ უპირატესობას ანიჭებს. მსგავსი შეთანხმება საკმაოდ მიღებული პრაქტიკაა პოკერის ტურნირებზე, თუმცა ეს ყველაფერი ღიად, მაყურებლებისა და ტურნირის ორგანიზატორების თანდასწრებით ხდება. ამჯერად კი, მაიკ ლისა და რაიან იუს შორის მოლაპარაკება კულისებში, კამერების გარეშე შედგა. 

ლის საქციელს საკმაოდ ნეგატიური გამოხმაურება მოჰყვა სხვა მოთამაშეებისგან. დენ ო'ბრაიანმა WPT-ის მენეჯმენტს მათი ტურნირებიდან სიტყვების 'ელიტარულისა' და 'პრესტიჟულის' ჩამოშორება მოსთხოვა. გარდა ამისა, ო'ბრაიანის აზრით, GPI-ის მენეჯმენტმა მაიკ ლი წლის საუკეთესო მოთამაშის რეიტინგიდან უნდა მოხსნას. საკმაოდ მკაცრი იყო ჯეისონ მერსიერი, რომელმაც მოთამაშეები იმის გამო გააკრიტიკა, რომ მათ ტურნირის ტრადიციას არ სცეს პატივი და გამარჯვებულის ტიტული ყოველგვარი თამაშისა და გემბლინგის გარეშე გაინაწილეს. ჯასტინ ბონომო, მოთამაშეების მიმართ, შედარებით რბილი აღმოჩნდა. მან თავად ტურნირის ორგანიზატორები გააკრიტიკა: "თუ სატურნირო სერიას მართავ, მოთამაშეებს ადმინისტრაციასთან თანამშრომლობის საშუალება უნდა მისცე. თუ მათ მოლაპარაკების საშუალებას სატელევიზიო ეთერით, მაყურებლის თანდასწრებით არ აძლევ, 'მაგიდის ქვეშ' დადებულ შეთანხმებაზე აღარ უნდა გაღიზიანდე!"