პოკერის მოყვარულებს, ხშირად, პროფესიონალი მოთამაშეების შემოსავლებთან დაკავშირებით არასწორი წარმოდგენა ექმნებათ: ცნობილი მოთამაშეების მიერ მოგებული ტურნირების თანხებით თუ ვიმსჯელებთ, კაზინო საუკეთესო ადგილად მოგეჩვენებათ, მაგრამ თუ ამ თანხებს იმ ხარჯს გამოვაკლებთ, რაც მგზავრობასთან, სასტუმროებთან და ტურნირის ბაი-ინებთან არის დაკავშირებული, მაშინ სურათი მნიშვნელოვნად შეიცვლება. 

თანამედროვე პოკერის ყველაზე პოპულარულმა მოთმაშემ, PokerStars-ის სახემ, დენიელ ნეგრანუმ, საკუთარ ბლოგზე გასული წელი შეაჯამა. 2017 წლის განმავლობაში, მან ტურნირების ბაი-ინების სახით $2.874.164 დოლარი დახარჯა, ხოლო დარეგისტრირებული ტურნირებიდან შემოსავლის სახით $2.792.104 მიიღო. ეს კი იმას ნიშნავს, რომ ნეგრანუს წელი $86.140 დოლარის მინუსით დასრულდა. 

"მას შემდეგ, რაც $936.000 დოლარი მოვიგე, ჩემი გრაფიკი მნიშვნელოვნად გამოსწორდა, - ყვება კანადელი მოთამაშე, - მაგრამ რამდენიმე ჰაი როლერ ივენთის შემდეგ, რომლებზეც წარუმატებლად ვითამაშე და რომლებზეც რამდენიმე რე-ბაი გავაკეთე, ყველაფერი თავდაყირა დადგა."

უცნობია, რა თანხას ღებულობს კანადელი მოთამაშე სპონსორებისგან. სავარაუდოდ, მას საკმაოდ სოლიდურ ხელფასს უხდიან. ნეგრანუ, ასევე, 'სტეიკინგზეც' საუბრობს, რაც ტურნირის ბაი-ინის ნაწილობრივ, ან მთლიან გადახდას გულისხმობს.

"მე ცალკეული კონტრაქტები მაქვს გაფორმებული PokerStars-თან და Poker Central-თან, მაგრამ ამ შემოსავლებს ჩემს სატურნირო კარიერასთან არანაირი კავშირი არ აქვთ. მომავალი წლის One Drop ტურნირისთვის, სავარაუდოდ, შემოსავლის გარკვეულ ნაწილს გავყიდი. ტურნირისთვის გადასახდელი თანხა $1.000.000 დოლარია, რაც საკმაოდ დიდი ფულია ტურნირზე გასარისკად. სავარაუდოდ, ბაი-ინის 50%-ს სხვა დაინტერესებული პირებისგან მივიღებ და შესაბამისად - მოგებული თანხის 50%-ს მათვე დავუბრუნებ."