ჭადრაკში მსოფლიოს ხუთგზის ჩემპიონი, ჭადრაკის საერთაშორისო ოსტატი, ვისვანათან ანანდი ინდოეთის პოკერის ლიგას შეუერთდა. ამიერიდან ის Poker Sports League-ის (PSL) სახე იქნება, რომელიც ბრენდს ფართო წრეებს წარუდგენს. 

Poker Sports League რამდენიმე წარმატებული ბიზნესმენის ერთობლივი პროდუქტია. მის შექმნაში მონაწილეობა მიიღეს მილიარდერმა ბიზნესმენმა და ინტრეპრენუერმა - ამიტ ბურმანმა; adda52.com-ის აღმასრულებელმა დირექტორმა - ანუჯ გუპტამ და theshark.in-ის მფლობელმა - პრანავ ბაგაიმ. მათი განცხადებით, PSL-ის მთავარი მიზანი პოკერისადმი საზოგადოების განწყობის შეცვლა და თამაშის ახლებური, სააზროვნო სპორტის იმიჯის ჩამოყალიბებაა.

ალექს დრეიფუსის Global Poker League-ის მსგავსად, PSL-ის შემქმნელებს იმედი აქვთ, რომ პოკერი სპორტის სტატუსს მიიღებს, რაც მის 'აზარტული სამყაროს კლანჭებიდან' გათავისუფლებას შეუწყობს ხელს. GPL-მა მიზანს ბოლომდე მაინც ვერ მიაღწია - პოკერი კვლავ აზარტულ თამაშად განიხილება. მისია ბევრად რთული იქნება ინდოეთისთვის, სადაც თამაშებისადმი ბევრად კონსერვატული მიდგომა აქვთ. 

თავად ჭადრაკის ოსტატს ბევრად ოპტიმისტური ხედვები აქვს. "უკანასკნელი წლების განმავლობაში, ჩვენ თამაშის მიმართ მოსახლეობის დამოკიდებულების ცვლილებების მომსწრენი გავხდით, - ამბობს ვისვანათან ანანდი, - პოკერის მოყვარულების მონდომებამ და ენთუზიაზმმა შედეგი გამოიღო და ახლა ჩვენ რამდენიმე ონლაინ ოპერატორი გვყავს. ჩემი დაკავშირება ამ ბრენდთან ხელს შეუწყობს თამაშის ახლებურად გაგებას. მსურს, რომ პოკერი ისეთივე სააზროვნო თამაშად წარმოვაჩინო, როგორიც ჭადრაკია. ჭადრაკს მთელი ცხოვრება ვთამაშობ, მაგრამ როცა პოკერს გავეცანი, მაშინვე უამრავი პარალელი გავავლე და უამრავი საერთო გადაკვეთა აღმოვაჩინე."