სამხრეთ კორეის კიბერ-უსაფრთხოების ექსმერტებმა გასულ ხუთშაბათს ანგარიში მოამზადეს, რომლის მიხედვითაც ირკვევა, რომ ჩრდილოეთ კორეის ტოტალიტარული მთავრობის მიერ დაფინანსებული ჰაკერები კიბერ-თავდასხმებით, ვირუსული შეტევებითა და არალეგალური მაქინაციებით ინტერნეტის სხვადასხვა წყაროებიდან, მათ შორის ონლაინ პოკერის საიტებიდან, ფულის მოპარვას რეგულარულად ცდილობენ.

რა თქმა უნდა, უსაფრთხოების სამსახურების მთავარი ყურადღება ქვეყნის ბირთვული შეიარაღებისკენაა მიმართული, რომლის დაფინანსებასაც მთავრობა უკანონოდ მოპოვებული ფულით ცდილობს. როგორც საერთაშორისო უსაფრთხოების ექსპერტები ვარაუდობენ, კიბერ-შეტევებითა და ონლაინ მაქინაციებით ფულის მოპოვება ამერიკისა და ევროპის მიერ ჩრდილოეთ კორეისთვის დაწესებულმა სანქციებმა გამოიწვიეს. 

როგორც Financial Security Institute-ის მიერ მომზადებულ ანგარიშშია ნათქვამი, საბანკო ანგარიშების გატეხვისა და საიდენტიფიკაციო ბარათებზე არსებული მონაცემების მოპოვების გარდა, ჰაკერები, პოკერის საიტებზე ვირუსების გავრცელებით, გარკვეული უპირატესობის მოპოვებას ცდილობენ, რომლითაც ისინი თამაშში ფულის მოგებას შეძლებენ. პოკერის საიტების გარდა, ჰაკერუი თავდასხმები სხვა აზარტულ თამაშებთან დაკავშირებულ საიტებზეც განხორციელდა. 

კიბერ-უსაფრთხოების სამსახურების მონაცემების მიხედვით, ჩრდილოეთ კორეის ჰაკერები უკანასკნელ წლებში განსაკუთრებით გააქტიურდნენ და საკმაო წარმატებასაც მიაღწიეს. კერძოდ, ვარაუდობენ, რომ გასულ წელს, ბანგლადეშის ბანკიდან გამქრალი £62.000.000 ფუნტის უკან სწორედ ჩრდილოეთ კორეაში მომზადებული ჰაკერები იდგნენ. ასევე, მათ მიაწერენ 2014 წელს Sony Pictures-ზე განხორციელებულ თავდასხმას და მიმდინარე წლის მაისში 150 ქვეყანაში მილიონობით კომპიუტერზე მიტანილ კიბერ-იერიშს.

New York Times-ის ცნობით, ჩრდილოეთ კორეას დაახლოებით 1.700-მდე ჰაკერი უნდა ჰყავდეს, რომელსაც 5.000-მდე ზედამხედველი მეთვალყურეობს. ჰაკერები, წესით, საზღვარგარეთ უნდა მუშაობდნენ და ტოტალიტარული რეჟიმისგან წამოსულ გზავნილებს უნდა ელოდებოდნენ.