სულ რამდენიმე დღეში World Poker Tour-ის ახალი სეზონი აიღებს სტარტს. როგორც WPT-ის მენეჯმენტი აცხადებს, ფესტივალზე ე.წ. Action Clock იქნება გამოყენებული. 

პირველად, წამზომი 2016 წლის WPT Tournament of Champions-ზე იყო გამოყენებული. წლევანდელი სეზონისთვის კი მის ამოქმედებას შემდეგი გრაფიკით გეგმავენ: წამზომი თამაშში მაშინ შემოვა, როდესაც ე.წ. 'ბაბლ' მოთამაშემდე და საპრიზო ადგილების დაწყებამდე ერთი მაგიდა იქნება დარჩენილი. ამ მომენტიდან ტურნირის დასრულებამდე, გადაწყვეტილებების მისაღებად, მოთამაშეებს 30 წამი ექნებათ. რთული სიტუაციების დროს, მოთამაშეებს საშუალება ექნებათ, გამოიყენონ სპეციალური ჩიპი, რომელიც დამატებით დროს იძლევა. 

წამზომის გამოყენების იდეა გასულ წლებში გაჩნდა და ის თამაშის აჩქარებას და გამოცოცხლებას ემსახურება. უამრავი მოთამაშე გამოთქვამდა პრეტენზიას იმის შესახებ, რომ თამაში ზედმეტად ნელა მიმდინარეობდა, რაც მზარდი ბლაინდებისა და ანტეების პირობებში, მოთამაშეებისთვის დამატებით დაბრკოლებებს ქმნის. რა თქმა უნდა, ტურნირის მონაწილეს ყოველთვის აქვს უფლება ტურნირის ადმინისტრატორს წამზომის ჩართვა სთხოვოს, მაგრამ აქ უკვე თავს იჩენს ეთიკურობის პრობლემა. ამას მოჰყვება სიტყვიერი დაპირისპირება მოთამაშეებს შორის, რომელიც კვლავ ტურნირის ორგანიზატორების მოსაგვარებელია. სწორედ ამიტომ WPT-ის ადმინისტრაციამ გადაწყვიტა ერთგვარი ექსპერიმენტისთვის მიემართა და საკუთარ ტურნირებზე წამზომი გამოეყენებინა. 

"World Poker Tour მოხარულია წარმოგიდგინოთ პირველი წამზომი, რომელიც ტურნირებში იქნება გამოყენებული, - თქვა WPT-ის აღმასრულებელმა დირექტორმა, მეტ სევიჯმა, - დამწყები, მოყვარული და პროფესიონალი მოთამაშეები ხშირად აღნიშნავდნენ, რომ სათამაშო მაგიდებთან მყოფი ხალხი დროს არასწორად ხარჯავდა, გადაწყვეტილების მიღებას სპეციალურად აჭიანურებდა, რითიც, საერთო ჯამში, სხვა მოთამაშეები ზარალდებოდნენ. პოკერი კი, პირველ რიგში, მხიარულებასთან და ცოცხალ თამაშთანაა დაკავშირებული. სწორედ ამიტომ, ჩვენმა გუნდმა მიიღო გადაწყვეტილება იმის შესახებ, რომ ტურნირების ფინალურ სტადიებზე წამზომი გამოგვეყენებინა."