როგორც რამდენიმე დღის წინ Bloomberg-ზე გამოქვეყნებული სტატია იუწყება, სენ ტროპეში, ლეონარდო დიკაპრიოს მიერ გამართული საქველმოქმედო აქციაზე, ედუარდ ნორტონთან და ჯონა ჰილთან პოკერის სესიის სათამაშოდ, უცნობმა პიროვნებამ $120.000 დოლარი გადაიხადა. ლეგენდარულმა მსახიობმა, რომელიც ისეთი ფილმებითაა ცნობილი, როგორებიც 'ამერიკული ისტორია X', 'მებრძოლთა კლუბი' და 'ბერდმენია', აზარტული თამაშების მოყვარულთა წრეებში პოპულარობის მოპოვება, 1998 წელს პოკერის მოთამაშეების შესახებ გადაღებული ფილმის, Rounders-ის წყალობით მოახერხა. მიუხედავად იმისა, რომ მეტ დეიმონთან და ჯონ მალკოვიჩთან ერთად შესრულებული როლის შემდეგ თითქმის 20 წელი გავიდა, პოკერის მოყვარულთა წრეებში, ნორტონი კვლავაც შულერთან და კარტების ვირტუოზ თაღლითთან ასოცირდება. ჯონ მალკოვიჩის მიერ განსახიერებული გმირი, Teddy KGB, ონლაინ გრაინდერების ერთ-ერთი საყვარელი ზედმეტსახელია. 

აქამდე უცნობია იმ პიროვნების ვინაობა, რომელმაც სოლიდური თანხის სანაცვლოდ, ჰოლივუდის მსახიობებთან გასატარებელი დროის გარდა, მსოფლიოს ერთ-ერთი წარმატებული მოთამაშისგან პოკერის გაკვეთილები უნდა მიიღოს. ნორტონის გარდა, თამაშში მონაწილეობას ჯონა ჰილი მიიღებს, რომელიც ფილმ Superbad-ით გახდა ცნობილი, ხოლო 2013 წელს ოსკარზე წარადგინეს, მეორეხარისხოვანი როლისთვის, ფილმიდან Wolf of Wall Street. 

"გეძლევათ უიშვიათესი შესაძლებლობა, ითამაშოთ ტეხასური ჰოლდემი ამერიკის კინოაკადემიის მთავარ ჯილდოზე სამჯერ ნომინირებულ მსახიობთან, ედუარდ ნორტონთან, რომელიც ცნობილია, როგორც Worm, ფილმიდან Rounders. ასევე საშუალება გექნებათ მიიღოთ რჩევები მსოფლიოს ერთ-ერთი საუკეთესო პროფესიონალი მოთამაშისგან და თავად მსახიობისგან მოისმინოთ ლეგენდარული ფილმის გადასაღებ მოედანზე მომხდარი ისტორიების შესახებ" - წერია საქველმოქმედო შემოთავაზებაში. 

ლეონარდო დიკაპრიოს საქველმოქმედო აქციამ $45 მილიონი დოლარის შეგროვება შეძლო, რომელიც იმ კომპანიებსა და ბიზნესებს მოხმარდება, რომლებიც გარემოს დაცვისა და გლობალური კლიმატის დარეგულირებისთვის იბრძვიან. აქვე უნდა ითქვას, რომ თავად დიკაპრიო პოკერისა და ნარდის დიდი მოყვარულია და ორივე თამაშის თეორიას საფუძვლიანად ფლობს, თუმცა, მსახიობისგან რაიმე სერიოზული სპორტული წარმატების შესახებ ჯერჯერობით არ გვსმენია.