WSOP-ზე დღევანდელი დღე საკმაოდ დატვირთული გამოდგა: სტარტიდან მოყოლებული, აქტიურ ფაზაში 6 ივენთი იმყოფებოდა, საიდანაც 2 მათგანზე ოქროს სამაჯური გათამაშდა. 

პირველ რიგში: ყველაზე მასშტაბური მოვლენა, რა თქმა უნდა, Colossus II იყო. ტურნირს, რომელზეც 21.613 მოთამაშე დარეგისტრირდა, რამდენიმე სასტარტო დღე ჰქონდა. ივენთის გამარჯვებული ბენ კილაინი გახდა, რომელმაც წარუმატებელი და დაძაბული პირველი სტარტის შემდეგ, არნახული 'ქამბექი' გვაჩვენა და ოქროს სამაჯურთან ერთად, $1.000.000 დოლარის მფლობელი გახდა. ფინალურ მაგიდაზე, კილაინი, სტეკის თვალსაზრისით მხოლოდ ჯირი ჰორაკს ჩამორჩებოდა. მაგრამ ძირითადი შავი სამუშაოს საკუთარ თავზე აღებისა და ფინალური მაგიდის მონაწილეების უმეტესობის გაგდების შემდეგ, მან დამაჯერებელი ჩიპლიდი მოიპოვა. საბოლოოდ, გადამწყვეტ ჰედს-აპზე, ბენ კილაინი სწორედ ჰორაკს დაუპირისპირდა, რომელმაც მეორე ადგილისთვის $618.000 დოლარი მიიღო. 

ლოურენს ბერგზე თუ არაფერი გსმენიათ, მის პროფესიონალიზმში დასარწმუნებლად ის ფაქტიც საკმარისია, რომ ის ე.წ. შერეული თამაშების - მიქსდ გეიმსის რეგულარია. Dealer's Choice სწორედ შერეულ თამაშებზე დაფუძნებული ტურნირია, სადაც პოკერის სახეობას ის მოთამაშე ირჩევს, რომელიც დილერის პოზიციაზეა. მსგავსი ტიპის ტურნირი, პოკერის პროფესიონალისთვის, ნამდვილი გამოცდაა. ლოურენს ბერგმა გამარჯვება 389 ენტრანტს შორის მოიპოვა. ფინალურ მაგიდაზე მას ისეთ მოთამაშეებთან მოუხდა დაპირისპირება, როგორებიც პოლ ვოლპი და ენდრიუ ბრაუნი არიან. მომავალ ჩემპიონს ნახევარი საქმე უკვე შესრულებული ჰქონდა: ფინალურ მაგიდამდე მისასვლელ გზაზე, მან, დარჩენილი 5 მოთამაშის ერთად აღებულ ჩიპებზე გაცილებით დიდი რაოდენობის სტეკი მოაგროვა, რაც საბოლოო მიზნის მიღწევაში ერთ-ერთი გადამწყვეტი ფაქტორი აღმოჩნდა. 

ამ პერიოდისთვის, პირველი $1.500 დოლარიანი ულიმიტო ჰოლდემის ივენთი ფინალურ სტადიას უახლოვდება. ტურნირზე დარეგისტრირებული 321 მოთამაშიდან, მხოლოდ 36 მათგანია აქტიური. ივენთის ჩიპლიდერი 2016 წლის WPT Seminole Hard Rock Poker Showdown-ის გამარჯვებული, ჯასტინ იანგია. 

ასევე გადამწყვეტ ფაზაშია შესული 2-7 დროუს $1.500 დოლარიანი ივენთი, რომლის ჩიპლიდერიც რაიან დი'ანჯელოა. უნდა ითქვას, რომ 2016 წლის ამომავალმა ვარსკვლავმა, დიმიტრი ურბანოვიჩმა ე.წ. 'ბაბლის' სტადია ვერ გადალახა. ფულში შესვლა მოახერხეს ისეთმა მოთამაშეებმა, როგორებიც ბარი გრინშტეინი, ელი ელეზრა, ჯენიფერ ჰერმანი, ერიკ საიდელი და დევიდ ბენიამინი არიან. თუმცა, ივენთის ფინალურ დღემდე მისვლა ვერცერთმა მათგანმა ვერ შეძლო.