როდესაც World Poker Tour Finale-ის უკანასკნელ მაგიდაზე თამაში დაიწყო, ორი ისტორიული მნიშვნელობის დაპირისპირებამ იჩინა თავი: ერთის მხრივ, ესპანელ ვუნდერკინდს, ადრიან მატეოსს გაუჩნდა ე.წ. 'სამმაგი გვირგვინის' დაუფლების შანსი; მეორეს მხრივ კი, იგივე ტიტულის მოპოვების საშუალება ჩინო რიმს მიეცა. ადრიან მატეოსმა, 21 წლის ასაკში, უკვე წარმოუდგენელ წარმატებას მიაღწია. მას WSOP-ის ერთი სამაჯური, WPT-ისა და EPT-ის თითო-თითო ტიტული აქვს მოპოვებული. საერთო ჯამში, მისი სატურნირო მოგება $3.2 მილიონ დოლარს აღემატება. 

ესპანელი მოთამაშისთვის სამწუხაროდ, ის, მალევე გამოეთიშა ფინალურ მაგიდას, რამაც რიმს, მესამე ტიტულის მოსაპოვებლად, კიდევ უფრო დიდი შანსი და მოტივაცია მისცა. მაგიდასთან მოთამაშეების შემცირებისა და ფინალურ ჰედს-აპთან დაახლოების პარალელურად, ჩინო რიმის გულშემატკივრების რაოდენობა სულ უფრო იზრდებოდა. 

როცა მაგიდასთან მხოლოდ სამი მოთამაშე დარჩა, სტეკების სიდიდით, აშკარა უპირატესობას ჩინო რიმი და ადიტია პრასეტიო ფლობდნენ. შორთ სტეკის სტატუსში მყოფი რიჩარდ ლეჯერი კი, შესაბამის კარტსა და გაორმაგების შანსს ელოდა. რიმის პრეფლოპ რეიზს, ლეჯერის 18 ბლაინდიანი ოლინი მოჰყვა, რაზეც რიმმა AT-ით მაშინვე უპასუხა. ლეჯერის A3 აშკარა უპირატესობას აძლევდა მოწინააღმდეგის ხელს. 995K6 ბორდმა, ლეჯერის ხელი ვერ გააუმჯობესა და ფინალურ ჰედს-აპზე, ერთმანეთის პირისპირ, რიმი და პრასეტიო აღმოჩდნენ. 

უნდა ითქვას, რომ გადამწყვეტი დაპირისპირების სასტარტო მომენტისთვის, სტეკების თვალსაზრისით, ჩინო რიმს მეტოქესთან 8-5-იანი უპირატესობა ჰქონდა. წყვილმა, საერთო ჯამში, 39 დარიგება ითამაშა. როდესაც რიმის უპირატესობა 13-1-მდე გაიზარდა, მან, 76-ით ოლინი გააკეთა, რაზეც მოწინააღმდეგემ K9-ით უპასუხა. JT477 ბორდმა, ჩინო რიმს ტრიპსი და WPT-ის მესამე ტიტული მისცა. 

ამ გამარჯვებით, რიმი იმ მოთამაშეთა ოთხეულში მოხვდა, რომელთაც WPT-ის 3-3 ტიტული აქვთ მოგებული. მათ შორის არიან: გას ჰენსენი, კარლოს მორტენსენი, ანტონი ზინო და, უკვე, ჩინო რიმიც. ტურნირის გამარჯვებულისთვის დაწესებული $705.885 დოლარის გარდა, რიმს, WPT Tournament of Champions-ის ივენთის ადგილიც ერგო, რომელიც დღეს, Seminole Hard Rock Casino-ში აიღებს სტარტს