ათწლეულის დაპირისპირებად აღიარებული ჰედს-აპი მნიშვნელოვან ფაზაში შედის. დენიელ ნეგრანუსა და დაგ პოლკის ორთაბრძოლა სულ უფრო ინტენსიური ხდება. ბოლო ორი მატჩი ნეგრანუს გამარჯვებით დასრულდა, საიდანაც უკანასკნელზე კანადელმა $117.000 დოლარის დაბრუნება მოახერხა. 10 დღიანი პაუზის მიუხედავად, როგორც ჩანს, ნეგრანუ ფორმას არ კარგავს და დაკარგული ფულის ამოღებას წარმატებით განაგრძობს.

ეს მათი მე-20 სესია იყო, რომელმაც წყვილს შორის წლების განმავლობაში არსებული დაპირისპირება უნდა გადაწყვიტოს.  საერთო ჯამში, 11.318 დარიგების შემდეგ, დაგ პოლკი $696.327 დოლარის პლუსშია. სულ ცოტა ხნის წინ, მოვლენები ისე განვითარდა, ყველა ფიქრობდა, რომ დაგ პოლკი მალე $1 მილიონიან ზღვარს გადალახავდა. ზუსტად ამ დროს მოიგო ნეგრანუმ მე-19 სესიაზე $143.000 დოლარი და მნიშვნელოვანი განაცხადი გააკეთა თამაშის ბედის შემოტრიალებაზე. ამის შემდეგ კი $117.000-იანი მე-20 სესიაც მოვიდა, რამაც პოლკის უპირატესობა მნიშვნელოვნად შეასუსტა. 

წყვილმა 25.000 დარიგება უნდა ითამაშოს. ჰედს-აპის პირობების თანახმად, 12.500 დარიგების შემდეგ, იმ მოთამაშეს, რომელიც თამაშს აგებს, უფლება აქვს ჰედს-აპის შეწყვეტა მოითხოვოს. ასეთი შესაძლებლობის მიუხედავად, ნაკლებსავარაუდოა, რომ დენიელ ნეგრანუ თამაშის გაგრძელებაზე უარს იტყვის - მასსა და პოლკს შორის მიმდინარე თამაში არამხოლოდ ფულის, არამედ პრესტიჟის საქმეცაა.