გასულ შაბათს, დაგ პოლკს საოცნებო სესია ჰქონდა: დენიელ ნეგრანუს წინააღმდეგ გამართულ ჰედს-აპ მატჩში მან დამატებით $332.000 დოლარი მოიგო, რითიც მისმა უპირატესობამ ნახევარ მილიონ დოლარს გადააჭარბა. 

WSOP.com-ზე მიმდინარე ჰედს-აპი, რომელსაც ბევრი ისტორიულ დაპირისპირებასაც უწოდებს, უკვე რამდენიმე კვირაა მიმდინარეობს. მიუხედავად იმისა, რომ ფავორიტად დაგ პოლკი მიიჩნეოდა, დუელის პირველი ფაზები გარდამავალი უპირატესობით მიმდინარეობდა. მეტიც, დენიელ ნეგრანუმ თამაში შთამბეჭდავად დაიწყო და პოლკის ჯიბიდან $100.000 დოლარზე მეტი მიიღო. 

ამ მომენტისთვის, წყვილმა 5.751 დარიგება ითამაშა. დაგ პოლკის ანგარიშზე $596.197 დოლარის პლუსია, რისი შემცირებაც, ან მინუსში გადაყვანაც ნეგრანუსთვის ურთულესი საქმე იქნება. მით უმეტეს, რომ თამაში ონლაინ სიცრცეში მიმდინარეობს, რაც პოლკისთვის ხელსაყრელ გარემოს ქმნის. 

"მე-12 სესია, 684 დარიგებაში +$332.178 დოლარი, - წერს დაგ პოლკი ტვიტერზე, - საოცარი სესია მქონდა. ყველაფერს მოვარტყი. ყოველი 'ჰირო' ქოლი გამართლებული აღმოჩნდა, ყველა დიდი ბლეფი წარმატებით დასრულდა, ყველა ოლ ინი ჩემი იყო. ასეთ სესიაზე ნებისმიერი იოცნებებს."

დიდი დანაკარგის მიუხედავად, დენიელ ნეგრანუ მორალურად არ ტყდება: "ამ საღამოს, კარგად ნათამაშებ სესიას კარგი ღვინით აღვნიშნავ. ძალიან კმაყოფილი ვარ საკუთარი თამაშით - ის ერთადერთი რამაა, რისი კონტროლიც შემიძლია. ბევრი რამ მაქვს გასაკეთებელი ანგარიშის გასათანაბრებლად, მაგრამ ასეთი სვინგები მოსალოდნელიც იყო."