პანდემიით გამოწვეული საფრთხეების გამო, უკვე არაერთი დიდი ტურნირი გადაერთო ონლაინ რეჟიმზე. კაზინოებისთვის დაწესებული შეზღუდვებისა და ვირუსის გავრცელების თავიდან აცილების მიზეზით, იგივე ზომები მსოფლიოს უდიდესმა სატურნირო სერიამ, WSOP-მაც მიიღო. 

გასულ კვირას, WSOP-ის ერთ-ერთმა თანამშრომელმა 31 ტურნირის განრიგი, ფაქტიურად, არალეგალურად გამოაქვეყნა. 'მოპარული' განრიგის გავრცელებას, WSOP-ის მესვეურებმა სრული ინფორმაციის გამჟღავნება ამჯობინეს. როგორც ირკვევა, 31 ტურნირი თავად WSOP-ის საიტზე ჩატარდება, ხოლო 54 ივენთის მასპინძელი მზარდი ონლაინ პლატფორმა - GGPoker იქნება. 

"ზაფხული ვერ ჩაივლის პოკერის მსოფლიო სერიების გარეშე, - თქვა WSOP-ის აღმასრულებელმა დირექტორმა, თაი სტუარტმა, - ჩვენ ახალ ლოკაციებს ვხსნით და ოფლაინ პოკერის განვითარებას ვცდილობთ, რომელსაც დიდი იმედით ვუყურებთ. მაგრამ შექმნილი მდგომარეობის გამო, გადავწყვიტეთ, რომ თანამშრომლობა GGPoker-თან უფრო გაგვეღრმავებინა." 

სატურნირო სერიას PokerGo  და Poker Central გააშუქებენ. თაი სტუარტის განცხადების მიუხედავად, კვლავ გაურკვეველი რჩება, არის თუ არა WSOP ჩვეულ რეჟიმში ჩატარების შანსი - კაზინოში, რეალური დილერებითა და მაყურებლების თანდასწრებით? ამჟამინდელი მონაცემებით, საერთო ჯამში, წლევანდელი WSOP 85 ივენთისგან იქნება შედგენილი. WSOP.com-ზე თამაში 1 ივლისიდან იქნება შესაძლებელი, ხოლო GGPoker-ზე გამართული 54 ტურნირიანი სერია 19 ივლისიდან 6 სექტემბრამდე გაიმართება. 

აქვე უნდა ითქვას, რომ ონლაინ რეჟიმში ჩატარებული სერიის მიუხედავად, ლოკაცია კვლავ მნიშვნელოვანია: ონლაინ ტურნირებში მონაწილეობის მიღება იმ მოთამაშეებს შეეძლებათ, რომლებიც ნევადის ან ნიუ ჯერსის შტატებში იქნებიან. ეს ინფორმაცია იმ მოთამაშეებს ეხებათ, ვინც 31 ტურნირის თამაშს უშუალოდ WSOP-ის საიტზე აირჩევს. კიდევ ერთი უცნაური საკითხი ისაა, რომ GGPoker-ზე გამართულ ტურნირებზე თამაშს მხოლოდ ის მოთამაშეები შეძლებენ, რომლებიც GGPoker-ის დაფარვის ზონაში იქნებიან. GGPoker კი ამერიკის ტერიტორიაზე არ ოპერირებს. შესაბამისად, გაურკვეველი რჩება ამერიკელი მოთამაშეების ბედი.