გასულ კვირას,  Global Poker Awards-ის ნახევარფინალისტების სია გამოქვეყნდა, რომელთა შორისაც ჰედს-აპის ლეგენდარული მოთამაშის, დაგ პოლკის სახელი არ იძებნება. იმის გათვალისწინებით, რომ დაგ პოლკი პროფესიონალურ პოკერს დიდი ხნის წინ ჩამოშორდა, ის მოთამაშეთა შორის ვერ მოხვდებოდა. მაგრამ რამდენადაც მას ერთ-ერთი ყველაზე პოპულარული ონლაინ გადაცემა მიჰყავს, მოლოდინი იყო, რომ ის საუკეთესო ვლოგერის პოზიციაზე მაინც იქნებოდა ნომინირებული. 

WSOP-ის 3 ოქროს სამაჯურის მფლობელი, რომლის არხსაც 35 მილიონი ნახვა აქვს, საკმაოდ განაწყენებული ჩანდა.  "Global Poker Awards-ის კანდიდატთა სია გამოქვეყნდა, რომელშიც მე ვერ მოვხვდი, - წერს 'ტვიტერზე' პოლკი, - გასულ წელს, მე 74 ვიდეო გამოვაქვეყნე და 35 მილიონი ნახვა დავაგროვე. პოკერი არ მითამაშია, მაგრამ ერთ-ერთი ყველაზე წარმატებული და ნაყოფიერი წელი მქონდა."

ნომინანტთა შორის მოხვდა ჯონათან ლითლი, რომელთან დაკავშირებითაც დაგ პოლკს კიდევ ერთი შენიშვნა აქვს: "ნომინაციის კატეგორია ვლოგებს, ანუ პოკერის სამყაროს შესახებ ვიდეო ბლოგებს ეხება. ჯონათნ ლითლი კი დარიგებებს განიხილავს და გლობალურ პოკერთან მას არაფერი აქვს საერთო."

როგორც Poker Awards-ის მფლობელი კომპანიის, Global Poker Index-ის დირექტორი, ერიკ დენისი ამბობს, კატეგორიაში ის 'იუთუბერები' მოხვდნენ, ვინც დღიურის მსგავს ვიდეო-ბლოგებს აკეთებდნენ.  დაგ პოლკი კი პოკერის საერთაშორისო ამბებს, მოთამაშეების ცხოვრებას, ინდუსტრიის სიახლეებს და პოკერთან დაკავშირებულ სხვა თემატიკას მიმოიხილავდა. დაგ პოლკი კიდევ უფრო შორს წავიდა და Global Poker Awards-ის ცერემონიას 'ჩაწყობილი' უწოდა.

"ვლოგერებს შორის თუ არა, წლის საუკეთესო მედია მომენტის ნომინაციაზე მაინც უნდა ვყოფილიყავი დასახელებული, - ამბობს პოლკი, - მე და ჯოი ინგრამს დაახლოებით ერთნაირი გამოხმაურება გვქონდა, მაგრამ ნომინირებული მხოლოდ ისაა. ყველაფერი ნათელია! ამ წრეში გაფასებენ არა იმის მიხედვით,  თუ რას აკეთებ, არამედ იმით, მოსწონხარ თუ არა 'მისტერ მეტი საკომისიო უკეთესია'-ს და მის კომპანიონებს". რა თქმა უნდა, დაგ პოლკი დენიელ ნეგრანუს გულისხმობდა, რომელმაც PokerStars-ის გაზრდილ საკომისიოზე შემდეგი კომენტარი გააკეთა: "More rake is actually better" - "გაზრდილი საკომისიო, სინამდვილეში, უკეთესია". უკვე წლებია, რაც დაგ პოლკი დენიელ ნეგრანუს აქტიურად აკრიტიკებს.