2019 დატვირთული წელი აღმოჩნდა პოკერის სამყაროსთვის. მას არც ვნებათაღელვა აკლდა, არც სკანდალები და არც დიდი საპრიზო ანაზღაურებები. იანვარი არამხოლოდ გასული წლის შესაჯამებლადაა საუკეთესო დრო, არამედ მიმდინარე წელზე ვარაუდების გაკეთების საშუალებას იძლევა. პოკერის მიმომხილველი მედიის წარმომადგენლები 2020 წლის პოკერთან დაკავშირებულ მოვლენებზე ალაპარაკდნენ, საიდანაც 3 მნიშვნელოვანი ამბავი შეიძლება გამოვყოთ:

1. ფილ გალფონდი ჰედს-აპ ჩელენჯს დამაჯერებლად მოიგებს - დიდი დარიგებების ეპოქა, როცა პატრიკ ანტონიუსი, ტომ დუანი, ვიქტორ ბლომი და ფილ აივი ერთმანეთში ასიათასობით დოლარს ცვლიდნენ, წარსულს ჩაბარდა. დღევანდელ ონლაინ პოკერში ხმაური მნიშვნელოვნადაა ჩამცხრალი. ახლა გრაინდერების დროა, რომლებიც შედარებით დაბალ ლიმიტებზე სტაბილურ მოგებას აჩვენებენ. თუმცა, ასეთი სტაბილურობა, განსაკუთრებით კი - მათ მიერ მოგებული თანხები მაყურებელთა ყურადღებას ვერ იპყრობენ. ამ ყველაფრის გამოსწორებას ფილ გალფონდი ცდილობს, რომელმაც ონლაინ ჰედს-აპ ჩელენჯი გამოაცხადა. საქმე ასეულობით ათას დოლარს ეხება, რომელსაც მოთამაშეები მაგიდაზე დებენ. მედიის წარმომადგენლები, ვინც გალფონდისა და მისი მომავალი მეტოქეების თამაშს წლების განმავლობაში აკვირდებოდნენ, Run It Once-ის დამფუძნებლისკენ იხრებიან და ამბობენ, რომ პოტ ლიმიტ ომაჰა სწორედ ის თამაშია, სადაც გალფონდს მნიშვნელოვანი უპირატესობა აქვს. თუ მათი მოლოდინები გამართლდა, ლეგენდარული მოთამაშის ბანკროლი რამდენიმე მილიონით გაიზრდება. 

2. WSOP-ის მეინ ივენთი გაიზრდება, PokerStars Players Championship კი პოპულარობას დაკარგავს - WSOP-ის უკანასკნელი წლების დინამიკამ ცხადყო, რომ უფრო და უფრო მეტ მოთამაშეს უნდა დიდ პოკერში ადგილის დამკვიდრება. თუ 2015 წელს მეინ ივენთს 6.420 მონაწილე ესწრებოდა, 2017-ში მათი რაოდენობა 7.221-მდე გაიზარდა. 2019 წელს კი მეინ ივენთის ენტრანტების რაოდენობამ 8.569 შეადგინა. ამის მიზეზად WSOP-ის აქტიური სარეკლამო კამპანია და აშშ-ში ონლაინ გემბლინგთან დაკავშირებული აკრძალვები სახელდება, რაც მოთამაშეებს ცოცხალ ტურნირებში ჩართულობისკენ უბიძგებს. რაც შეეხება PokerStars Players Championship-ს: დინამიკა ამ შემთხვევაშიც მზარდია. გასული წლის ბაჰამის სერიებმა ნათლად აჩვენა, რომ სულ უფრო მეტი ადამიანია მზად ძვირადღირებულ ტურნირში $25.000 დოლარი გადაიხადოს. მაგრამ აქვე უნდა აღინიშნოს ისიც, რომ PokerStars-მა მნიშვნელოვნად მოუკლო მოთამაშეთა მხარდამჭერ აქციებს, Platinum Pass-ების რაოდენობა საგრძნობლადაა შემცირებული. ამასთან ერთად, ჰაი როლერებს შესაძლებლობა აქვთ გაცილებით მაღალი ლიმიტის სატურნირო თამაშები მაკაუში, ან Triton-ის სერიებზე მოძებნონ.

3. ფილ აივი ყველაზე შემოსავლიანი მოთამაშეების ტოპ 15-დან გამოვარდება - სატურნირო ბაი-ინების ზრდასთან ერთად, მოთამაშეთა შემოსავლებიც იზრდება. ყველაზე შემოსავლიანი მოთამაშეების სიის ლიდერობა ჯასტინ ბონომოს არ დასცალდა. ის მალევე ბრინ კენიმ ჩამოიტოვა უკან, რომელმაც $50.000.000 დოლარიან ნიშნულს გადააბიჯა. ასეთი დინამიკის გათვალისწინებით, პოკერის ანალიტიკოსები ტოპ 15-დან ფილ აივის გამოვარდნას ვარაუდობენ. საქმე იმაშია, რომ აივიმ პოკერის აზიურ სამყაროში გადაინაცვლა, სადაც ასტრონომიული ლიიმიტების ქეშ-გეიმები იმართება. ერთ დროს, ის პოკერში არსებული ყოველი მაჩვენებლის სათავეში იყო, მაგრამ მაკაუში გადასვლის შემდეგ, მისი სახელი ჩრდილში მოექცა. ამ ვარაუდს ისიც ამყარებს, რომ ფილ აივი ლას ვეგასის თამაშებით, ფაქტიურად, აღარ ინტერესდება. მისი ეკრანზე ნახვა მხოლოდ Triton-ის ივენთებზეა შესაძლებელი, სადაც ძირითადად ქეშ-გეიმებში ღებულობს მონაწილეობას.