პოკერის სამყაროში თაღლითები და ე.წ. ჩითერები არავის უყვარს. მათ განსაკუთრებულად ნეგატიურად აღიქვამენ. რამდენიმე დღის წინ, დენიელ ნეგრანუმ ეჭვქვეშ დააყენა იმ ადამიანების რეპუტაცია, ვინც ე.წ. VPN-ებს, ანუ IP მისამართის შემცვლელ კლიენტებს იყენებენ. 

თავდაპირველად, VPN-ის აუცილებლობა ე.წ. Black Friday-ის შემდეგ გაჩნდა, როცა აშშ-ის ტერიტორიაზე ონლაინ პოკერი აიკრძალა. მოთამაშეებს ორი არჩევანი ჰქონდათ: დაეტოვებინათ ამერიკა, ან გამოეყენებინათ VPN, რომელიც სახლიდან გაუსვლელად თამაშის საშუალებას იძლეოდა. 

"ტეხასში ონლაინ პოკერი აკრძალულია, - წერს 'ტვიტერის' გვერდზე დენიელ ნეგრანუ, - თაღლითობენ თუ არა ის მოთამაშეები, ვინც VPN-ის გამოყენებით მაინც ახერხებენ თამაშს? მე ტორონტოში გავიზარდე, სადაც არალეგალურ თამაშებში ვღებულობდი მონაწილეობას. რამდენად იყო ჩემი საქციელი არაეთიკური, ან დამიძახებდით თუ არა მე თაღლითს?"

კანადელი მოთამაშის მიერ შექმნილ გამოკითხვაში 15.919 გულშემატკივარმა მიიღო მონაწილეობა. მათი 76% თვლის, რომ VPN-ის გამოყენება მოთამაშის რეპუტაციას ეჭვქვეშ არ უნდა აყენებდეს. ნაიალ ფარელის აზრით, ასეთი "თაღლითობის" ერთადერთი მსხვერპლი თავად მოთამაშე შეიძლება გახდეს, რომელიც კანონმდებლობის წინააღმდეგ მიდის - გამოჭერის შემთხვევაში მას დიდი ჯარიმების აღება მოუწევს. სხვა მხრივ კი, ასეთი საქციელით არც მისი მოწინააღმდეგეები ზიანდებიან და არც თავად პოკერ-რუმი. 

თუმცა, პოკერის ისტორიას ახსოვს ბრაიან ჰასტინგსი, რომელიც ასევე VPN-ს იყენებდა, რათა საკუთარი ექაუნთის გარდა, სხვა ექაუნთებითაც ეთამაშა. მოგვიანებით, მისი სქემა გაშიფრულ იქნა. წარმატებული კარიერის მიუხედავად, ჰასტინგსი პოკერში ერთ-ერთ ანტიგმირადაა აღიარებული.