წლევანდელი WSOP, ტრადიციულად, თანამშრომლებისთვის შექმნილი სპეციალური ტურნირით გაიხსნა. WSOP-ის ორგანიზატორები, ივენთების დირექტორები და დილერები ის ადამიანები არიან, ვინც პოკერის ათიათასობით გულშემატკივრისა და ლას ვეგასის სტუმრებისთვის მსოფლიოს უდიდეს სატურნირო სერიას მართავენ.  

გარდა ამისა, იმის გამო, რომ წელს World Series Of Poker 50-ედ იმართება, საიუბილეო თარიღის აღსანიშნად, სერიების ადმინისტრაციამ განსაკუთრებულად დაბალი ღირებულების ტურნირი გამართა, რომლის გარანტირებული საპრიზო ფონდი $5.000.000 დოლარს შეადგენდა, ხოლო ბაი-ინი სულ რაღაც - $500 დოლარს. ღონისძიების მიზანი WSOP-ში მეტი ადამიანის ჩართვა და ხელმისაწვდომობა იყო. 

ტურნირის სარეგისტრაციო ფაზა მცირე გართულებებით გამოირჩეოდა. გასაკვირი არცაა: ღონისძიების პირველ 3 დღეზე 18.000 მეტი მონაწილე დარეგისტრირდა და დარჩენილი კიდევ ერთი სარეგისტრაციო დღეა. ტურნირზე მოთხოვნა იმდენად დიდი აღმოჩნდა, რომ ადმინისტრაციამ ყოველდღიური მცირე ღონისძიებები გააუქმა, რათა ადგილი BIG50-თვის გამოეყო. თამაში არამხოლოდ ძირითად დარბაზში, არამედ ვესტიბულში, დერეფნებსა და ბოულინგის დარბაზებშიც კი მიმდინარეობს.  

BIG 50-ის ივენთი ყოველი კომპონენტით 50 წელთანაა დაკავშირებული: 50 წუთიანი ლეველები, 50.000 ჩიპიანი საწყისი სტეკი, $5.000.000 დოლარიანი გარანტირებული საპრიზო ფონდი. ამ მომენტისთვის, ტურნირის ჩიპ ლიდერი ალი იმსიროვიჩია.