რამდენიმე დღის წინ, WSOP-ის ადმინისტრაციამ 2019 წლის საზაფხულო სერიების განრიგი გამოაქვეყნა, რომელიც 80 ლაივ და 9 ონლაინ ტურნირს აერთიანებს. 

რამდენადაც WSOP 50-ე წლისთავს ზეიმობს, სერიების მენეჯმენტმა მოთამაშეებისთვის სასიამოვნო სიახლეების შეთავაზება გადაწყვიტა, რომლის მთავარი დევიზი ასე შეიძლება გავიგოთ: "მეტი ღირებულება, ნაკლები გადასახადით". 

"ჩვენ დარწმუნებულები ვართ, რომ მოთამაშეებს მსგავსი სტეკები და სტრუქტურა WSOP-ის არცერთ გამოშვებაზე არ ექნებათ ნანახი, - ამბობს WSOP-ის საზოგადოებასთან ურთიერთობის სამსახურის უფროსი, სეთ პალანსკი, - ჯეკ ეფელს და მის გუნდს სურდა, რომ რეალური ცვლილებები ეჩვენებინათ. მათი მთავარი მიზანი ტურნირის მონაწილეებისთვის უფრო ხანგრძლივი თამაშის შეთავაზება იყო. ამიტომაც, მოთამაშეები ტურნირების პირველ დღეზე თავს გაცილებით კომფორტულად და მშვიდად იგრძნობენ."

უფრო დიდი სტეკი მეტ ღირებულებას არ ნიშნავს - WSOP-ის მენეჯმენტმა ეს კარგად იცის. როგორც პოკერის ინდუსტრიის ერთ-ერთი ყველაზე უკმაყოფილო და განაწყენებული წარმომადგენელი, ალენ კესლერი ამბობს, წლევანდელი WSOP-ის სტრუქტურა მხოლოდ ტაშს იმსახურებს. კესლერისგან კომპლიმენტის მიღება კი ურთულესი საქმეა. "მოთამაშეები შარშანდელის მსგავს, ან უკეთეს სტრუქტურას მიიღებენ, მაგრამ გაცილებით დიდი სტეკებით. ეს კი იმას ნიშნავს, რომ გვიან რეგისტრაციაზე სტეკის ღირებულება გაცილებით დიდი იქნება" - ამბობს კესლერი.

ტურნირების საფასური $400-დან $100.000 დოლარამდე იქნება. შენარჩუნებული იქნება ტურბო ღონისძიებები, რომლებიც იმ ადამიანებისთვისაა განკუთვნული, ვისაც ან სწრაფი თამაში უყვარს, ან დროის უქონლობას განიცდის. რაც მთავარია,  WSOP ბოლო ერთი წლის ტრენდს არ ჩამორჩა და გრაფიკში Short Deck ივენთები დაამატა.