დოილ ბრანსონისთვის გაუგებარია, რატომ ცდილობენ პროფესიონალი მოთამაშეები გემბლერების ინფორმირებას, მათი თამაშის გაუმჯობესებას და ზოგადად პოკერის დონის ამაღლებას? რამდენიმე თვის წინ, ლეგენდარულმა მოთამაშემ დენიელ ნეგრანუს მსგავსი შინაარსის საყვედურით მიმართა. ჩნდება განცდა, თითქოს, დოილ ბრანსონს მის მიერ დაწერილი ლეგენდარული წიგნი - "სუპერ სისტემა" საერთოდ გადაავიწყდა. არა და, სწორედ ბრანსონის წიგნს მოიხსენიებენ 'პოკერის ბიბლიად', რომელმაც პირველად დააფიქრა აზარტული სამყარო პოკერის კონცეფციების ძირეულ შესწავლაზე. 

ფილ გალფონდი მოთამაშეთა სწორედ იმ კატეგორიას მიეკუთვნება, ვინც პოკერის განვითარებასა და თამაშის დახვეწაზე ზრუნავს. უკვე 6 წელი გავიდა მას შემდეგ, რაც ონლაინ გრაინდერმა, რომელთან პირისპირ თამაშიც ბევრს აშინებდა, სატრეინინგო საიტი - Run It Once შექმნა. 

Run It Once ფილ გალფონდისა და დენ ქუინის პირმშოა. მიუხედავად იმისა, რომ გალფონდის საგანმანათლებლო საქმიანობა გაცილებით ადრე იწყება, მან არასაკმარისად ჩათვალა Youtube-ზე ატვირთული ვიდეოები და გაცილებით ინტენსიური მუშაობა განიზრახა. მის გარდა, საქმეში ონლაინ პოკერის რამდენიმე დიდი სახელიც ჩაერთო.

გალფონდის გათვლა საკმაოდ კომპლექსური იყო: ნაცვლად იაფფასიანი პროდუქტისა, რომელიც ინტერნეტში მრავლად იყო, მისი საიტის მომსახურებაში დაინტერესებულ მხარეს სოლიდური თანხის გადახდა უწევდა. $9.99 დოლარად, ონლაინ გემბლერს საშუალება ჰქონდა კვირაში რამდენიმე ვიდეოს გაცნობოდა, რომელიც მიკრო ლიმიტებსა და პოკერის ძირითად კონცეფციებს მოიცავდა. თვეში $99 დოლარის გადახდის შემთხვევაში კი, ისეთი მოთამაშეების ლექციების მოსმენა იყო შესაძლებელი, როგორებიც ბენ სალსკი, დი და ჰეკ დენგები, ბრაიან რასტი და თავად ფილ გალფონდი იყვნენ. გათვლამ გაამართლა: მოთამაშეები, რომლებიც პოკერით სერიოზულად იყვნენ დაინტერესებულნი, მზად აღმოჩდნენ ძვირადღირებული კურსი გაევლოთ. 

გასულ თვეში, გალფონდის გუნდმა საერთაშორისო ბაზრის ათვისება გადაწყვიტა. 6 წლის განმავლობაში, ყოველდღიურად, გუნდი 2 ვიდეოს უშვებდა. დაგროვილი მასალით ფართო აუდიტორიაზე წვდომა გახდა შესაძლებელი. 15 ოქტომბერს, Run It Once-ის ეგიდით, სატრეინინგო კურსი პორტუგალიურენოვანი მოსახლეობისთვის გახდა ხელმისაწვდომი. პორტუგალიურ ნაწილს სათავეში ბრაზილიელი MTT-ის სპეციალისტი, პედრო მადეირა ჩაუდგა სათავეში. მალევე, ვიდეოები ესპანურ, გერმანულ, ფრანგულ და იტალიურ ენებზე გავრცელდა. 

"მსოფლიოში პოკერის უამრავი მოთამაშეა, ვისთვისაც ინგლისური მშობლიურ ენას არ წარმოადგენს, - ყვება Run It Once-ის აღმასრულებელი დირექტორი, ჯეიმს ჰადსონი, - პოკერის ადეკვატურ და ხარისხიან თეორიულ მასალაზე წვდომა მათთვის პრობლემას წარმოადგენს. ამიტომაც, გადავწყვიტეთ, არაინგლისურენოვანი მოსახლეობისთვისაც მიგვეცა საშუალება პოკერის სიღრმეს მშობლიურ ენაზე ჩაწვდომოდნენ."

ჯერ კიდევ უცნობია, როდის დაიწყებს ფუნქციონირებას Run It Once-ის პოკერ-რუმი. პირველი ოფიციალური განცხადება ფილ გალფონდმა 2013 წელს გააკეთა. მას შემდეგ, ასიათასობით ადამიანი პოკერის სამყაროს ერთ-ერთ ყველაზე სანდო და პოზიტიური ფიგურის პროექტს ელოდება.