ვისაც პოკერის ცოტა რამ მაინც გაეგება, ყველამ იცის, რომ რაც უფრო დიდია სტეკი ბლაინდებთან მიმართებაში, მით მეტი მოგების შანსი აქვს კარგ მოთამაშეს. ჩნდება კითხვა: რატომ აწესებენ კაზინოები ტურნირებისთვის გვიან რეგისტრაციას და განსაკუთრებით - რატომ რეგისტრირდებიან პროფესიონალი მოთამაშები დაგვიანებით, როცა ბლაინდები გაზრდილია? 

უნდა ითქვას, რომ ყოველთვის ასე არ იყო: კაზინოების უმეტესობას სტანდარტული რეგისტრაცია ჰქონდა და ღონისძიებაზე დაგვიანება ტურნირის გამოტოვებას ნიშნავდა. ახლა კი, მოთამაშეებს 2 დღის დაგვიანებითაც შეუძლიათ რეგისტრაციის გავლა. როგორც წესი, დადებითი კომენტარები იმ ტურნირებს ეკუთვნით, რომლებსაც კარგი სტრუქტურა - დიდი სტეკი და ხანგრძლივი ლეველები აქვთ. მაშინ რაღა საჭიროა თამაშის იმ დროს დაწყება, როცა 200 ბიგ ბლაინდის ნაცვლად, სტეკი სულ რაღაც 25 ბიგ ბლაინდს შეადგენს?

პირველ რიგში, ამით კაზინოები იგებენ: თუ თქვენ კაზინოს მფლობელი ხართ და ტურნირი 6 საათზე გაქვთ დაანონსებული, ხოლო პოტენციური მოთამაშეების ნაწილი სამსახურს 7-ზე ამთავრებენ, 2-3 საათიანი გვიანი რეგისტრაცია საშუალებას გაძლევთ ტურნირის მონაწილეთა რაოდენობა და საპრიზო ფონდი მნიშვნელოვნად გაზარდოთ. 

მოყვარული მოთამაშეებისთვის გვიანი რეგისტრაცია კომფორტულ გრაფიკს ნიშნავს. მაგრამ მოხერხებული გრაფიკის გარდა, გვიანი რეგისტრაცია მარათონული სესიების თავიდან აცილების საშუალებასაც იძლევა. რატომ უნდა ითამაშოს მოყვარულმა საათობით, როცა მას ფულში მოხვედრის იმედიც კი არ აქვს? 

აი რაც შეეხებათ პროფესიონალ მოთამაშეებს, აქ ყველაფერი სხვაგვარადაა. მიუხედავად იმისა, რომ დიფ სტეკის პირობებში, მათ სხვა, გაცილებით სუსტ მოთამაშეებზე გავლენის მოხდენა და მათი გამოუცდელობის გამოყენება შეუძლიათ, ისინი მაინც გვიან რეგისტრაციას ანიჭებენ უპირატესობას. ამის მიზეზი ICM-შია. ICM - Independent Chip Model სათამაშო ჩიპების მონეტარულ ჭრილში განხილვისა და დათვლის საშუალებას იძლევა. მაგალითად, ICM გამოიყენება ფინალურ მაგიდებზე, როდესაც ტურნირში რამდენიმე მოთამაშეა დარჩენილი, რომლებსაც სტეკების შესაბამისად საპრიზო ფონდის განაწილება სურთ. 

პროფესიონალი მოთამაშეები კი ICM-ს შემდეგნაირად განიხილავენ: თუ ტურნირის საფასური $100 დოლარია და მასზე 100 მოთამაშე დარეგისტრირდა, გამოდის, რომ საპრიზო ფონდი $10.000 დოლარია, ხოლო სტეკის ღირებულება $100 დოლარს შეადგენს. თუ ტურნირს 40 მონაწილე გამოეთიშა, ხოლო პროფესიონალმა მოთამაშემ $100 გვიან იყიდა ადგილი, მისი სტეკს $100 დოლარის ნაცვლად, გაცილებით დიდი ღირებულება ექნება. მიუხედავად იმისა, რომ ასეთ დროს საწყისი სტეკი 100 ბიგ ბლაინდის ნაცვლად 25-30 ბიგ ბლაინდამდე იქნება შემცირებული, პროფესიონალ მოთამაშეებს მაინც ექნებათ გარკვეული უპირატესობა, რაც გამოცდილებასა და მენტალურ სიმტკიცეში გამოიხატება. 

სწორედ ესაა მიზეზი, თუ რატომ რეგისტრირდება ფილ ჰელმუტი, ან დენიელ ნეგრანუ ტურნირის მე-2 ან მე-3 დღეს.