ლეგენდარული ონლაინ გრაინდერი, ულიმიტო ჰოლდემის ერთ-ერთი საუკეთესო სპეციალისტი ჰედს-აპის მიმართულებით - დაგ პოლკი დიდი პოკერიდან მიდის. 

ამის შესახებ ამერიკელმა მოთამაშემ ფართო პუბლიკას საკუთარი 'იუთუბის' გვერდიდან აცნობა. უნდა ითქვას, რომ პოლკი ერთ-ერთი პირველი და, ამავდროულად, ერთ-ერთი საუკეთესო იყო, ვინც Youtube-ის საშუალებით პოკერს პოპულარიზაციას უწევდა. ასეულობით დარიგების გარჩევა, პოკერის ინდუსტრიის ალტერნატიულ ჭრილში განხილვა, ონლაინ პოკერ-რუმებისა და მათი ამბასადორების კრიტიკის ქარცეცხლში გატარება, გემბლინგთან დაკავშირებული სატირული იუმორი - ეს იმ კონტენტის მცირე ჩამონათვალია, რაზეც მაყურებლებსა და გულშემატკივრებს დაგ პოლკის გვერდზე მიუწვდებოდათ ხელი. 

მის არხს 200.000-ზე მეტი გამომწერი ჰყავს. მისი აზრის გათვალისწინება პოკერის ისეთ გიგანტებს უწევდათ, რომლებიც პუბლიკისა და ცალკეული მომხმარებლების შეხედულებებს ნაკლებ ყურადღებას აქცევენ. 

უკანასკნელად, დაგ პოლკმა $300.000 დოლარიანი Super High Roller Bowl ითამაშა და მოიგო კიდეც. მისი ერთ-ერთი უმთავრესი ამოცანა ახალგაზრდა მოთამაშეებისთვის იმის დამტკიცება იყო, რომ ონლაინ პოკერ-რუმების მიკრო ლიმიტებზე ფულის მოგება კიდევაა შესაძლებელი. ამისთვის მან $10.000 დოლარიანი ჩელენჯი გამოაცხადა, რომლის დროსაც $100 დოლარიანი ბანკროლი $10.000 დოლარამდე გაზარდა. 

როგორც პოლკი ამბობს, რამდენიმე დოლარით მან არაჩვეულებრივი კარიერის შექმნა და, რაც მთავარია - ფინანსური დამოუკიდებლობის მოპოვება შეძლო; ახლა კი თამაშის აუცილებლობას ვერ ხედავს, რის გამოც პოკერთან ყოველგვარ შეხებას წყვეტს. 

უნდა ითქვას, რომ პოკერზე გულაცრუება ლეგენდარულ მოთამაშეს კარგა ხანია ეტყობა. ის სულ უფრო ნაკლებად იყო დაინტერესებული ერთ დროს მისთვის საყვარელი თამაშით. მისი ინტერესი, უმეტესად, Youtube-ზე ახალი იუმორისტული არხისკენაა მიმართული. თუმცა, შესაძლოა, ვანესა სელბსტისა და ფედორ ჰოლცის მსგავსად, დაგ პოლკის მალე ვიხილოთ პოკერის მაგიდისკენ მობრუნებული და თამაშით გართული.