ლას ვეგასის პროკურატურის ინფორმაციით, დაკავებულია შელბი მაკკანი, რომელიც წლების განმავლობაში, ერთ-ერთ ყველაზე წარმატებულ ამერიკულ მედია გამოცემა CardPlayer-ს ფულს პარავდა. 

შელბი მაკკანს, რომელიც CardPlayer-ში ანა მაკკანის სახელით მუშაობდა, 24 ბრალდება აქვს წაყენებული. გამოცემაში საქმიანობა მან 2011 წელს, ბუღალტერის პოზიციაზე დაიწყო და 2016 წლამდე საკუთარ სახელზე არაერთი ჩეკი გამოიწერა, რომლითაც საკრედიტო ბარათის დავალიანებებს იხდიდა. მან რამდენჯერმე თვითნებურად გაიზარდა ხელფასი.

5 წლის განმავლობაში, მაკკანმა კომპანიის ანგარიშიდან $1 მილიონ დოლარზე მეტი მოიპარა. 2016 წელს სამსახური საკუთარი სურვილით დატოვა და საცხოვრებლად ჰავაიში გადავიდა. თაღლითური სქემის შესახებ სწორედ მისი წასვლის შემდეგ შეიტყვეს, როდესაც საბანკო ანგარიშებზე გადასახადებისთვის საჭირო თანხა აღარ აღმოჩნდა. 

როგორც თავად CardPlayer-ის აღმასრულებელი დირექტორი - ბარი შულმანი ამტკიცებს, მაკკანმა კომპანიას $1.4 მილიონი დოლარის ზარალი მოუტანა. პროკურატურა კი სავარაუდო თაღლითს $1.1 მილიონს ედავება. ბარი შულმანის შვილის - ჯეფ შულმანის განცხადებით, ოჯახმა კუთვნილი რამდენიმე ათეული ათასი დოლარი გადაიხადა, რათა კომპანიის მუშაობა არ შეფერხებულიყო. ჯეფ შულმანი იმასაც იხსენებს, რომ როდესაც გამოძიება დაიწყეს, გაარკვიეს, რომ შელბი მაკკანი არამხოლოდ ფულს იპარავდა, კომპანიის სახელით საკუთარ თავს ძვირადღირებულ ყვავილებს უგზავნიდა: "კომპანიის თანამშრომლები მიყვებოდნენ, როგორ დადიოდა მაკკანი ოფისში და როგორი სიამაყით აჩვენებდა თანამშრომლებს მისი ქმრის მიერ გამოგზავნილ ყვავილებს, რომლებიც სინამდვილეში კომპანიის ფულით იყო ნაყიდი." 

უკანასკნელი ინფორმაციით, შელბი მაკკანმა და მისმა ქმარმა ანგარიში გახსნეს, რომელზეც მათი გულშემატკივრები ფულს რიცხავენ, რათა ცოლ-ქმარმა მაღალანაზღაურებადი ადვოკატის აყვანა და ღირსეული თავდაცვა შეძლონ.