აქტიური ევროპიზაციის პერიოდში, როდესაც ქვეყანა მაქსიმალურად ცდილობს ბიზნესების პრივატიზებას და მოძველებული, საბჭოთა რეგულაციების შედარებით რბილი და ლიბერალური კანონმდებლობით ჩანაცვლებას, თამაშის მოყვარულებს უკრაინამ სასიამოვნო ამბავი მოუმზადა: უკრაინის სპორტისა და ახალგაზრდობის სამინისტროს 3780-ე დადგენილების მიხედვით, პოკერი სპორტის სახეობად გამოცხადდა. 

ამ გადაწყვეტილების მიხედვით, გემბლინგის წინააღმდეგ მიმართული კანონი ყველასთვის საყვარელ თამაშს აღარ შეეხება. 2010 წლამდე, უკრაინაში პოკერს მეტ-ნაკლებად რბილად უდგებოდნენ, მაგრამ 2009 წლის შემდეგ ყველაფერი შეიცვალა და იუსტიციის მინისტრმა პოკერი აზარტული თამაშების სიაში, სლოტებისა და ბლექ ჯექის პარალელურად შეიყვანა. კანონმდებლობაში ანტი-გემბლინგ რეგულაციები ძალაში 2010 წელს შევიდა, რაც იმას ნიშნავდა, რომ ქვეყანაში აზარტული ბიზნესი ოფიციალურად იკრძალებოდა. 

პოკერ-რუმებისა და კლუბების უკმაყოფილება სასამართლო დავით დასრულდა: 2013 წელს, უკრაინის უმაღლესი სასამართლო პოკერის მოყვარულების მხარეს დადგა და მათ ტურნირების თამაშის უფლება დაუბრუნა. თუმცა, დადებითი გადაწყვეტილება მხოლოდ ტურნირებს შეეხო - ქეშ-გეიმს აკრძალვები შეუნარჩუნდა. 

მთავრობის ასეთ მკაცრ ზომებს პოკერის ოპერატორებისგან მძიმე რეაქცია მოჰყვა: iPoker-ის ქსელმა, რომელიც William Hill-ს, Betfair-სა და Ladbrokes-ს აერთიანებდა, ბიზნესის დაცვის მიზნით ქვეყნის ტერიტორია დატოვა. iPoker-ის უკრაინიდან გასვლა ყირიმის კრიზისს დაემთხვა, რაც მძიმე ეკონომიკური მდგომარეობის ფონზე, ქვეყნისთვის კიდევ ერთი დარტყმა აღმოჩნდა. 

მაშინ, როდესაც პოკერი ოფიციალურად იკრძალებოდა, უკრაინამ მსოფლიოს არაჩვეულებრივი მოთამაშეები აჩუქა: იუჯინ კაჩალოვი - $9.235.296 დოლარიანი კარიერული შემოსავლითა და ევგენი ტიმოშენკო - $7.684.951 დოლარიანი მოგებით. უნდა ვივარაუდოთ, რომ პოკერის სპორტად აღიარების შემდეგ, როდესაც თამაშისთვის თანამედროვე, ლიბერალური რეგულაციები დაწესდება, უკრაინაში პოკერი ახალ სიცოცხლეს ნახავს, რაც ქვეყანაში თამაშის დონეს კიდევ უფრო აამაღლებს.