ლეგენდარულმა ქეშ-გეიმერმა, ჟან-რობერ ბელანდმა, რომელიც ექსცენტრიული ხასიათითა და სკანდალური ცხოვრებით გამოირჩევა, როგორც იქნა, WSOP-ის პირველი ოქროს სამაჯურის მოგება მოახერხა. "მთელი ეს ლაპარაკები იმაზე, რომ WSOP-ის მოგება ვერ მოვახერხე, ძალიან მაღიზიანებს, - ყვებოდა ფინალური მაგიდის დაწყებამდე ლას ვეგასელი გემბლერი, - ტურნირზე კარგი დროის გატარებას, გართობას და, რაც მთავარია, საშინელი ქოლების გაკეთებას ვაპირებ." 

ტურნირისა და $616.302 დოლარის მოგების შემდეგ, ბელანდის რიტორიკა სრულიად შეიცვალა: "ულიმიტო ჰოლდემში სამაჯურის მოგება განსაკუთრებით სასიხარულო იყო, რადგან პოკერის ეს სახეობა ჩემს საუკეთესო თამაშად ვერ ჩაითვლება, - ამბობს გამარჯვებული, - საკუთარ თამაშზე ძალიან ბევრი ვიმუშავე, მაგრამ ვიცი, რომ ტურნირზე მყოფი უამრავი მოთამაშე ჩემზე ბევრად წინ იყო. ულიმიტო ჰოლდემში მოგებულ პირველ ოქროს სამაჯურზე ვერც კი ვიოცნებებდი."

კვირას გამართულ ფინალურ მაგიდაზე, ტურნირზე დარეგისტრირებული 621 მოთამაშიდან მხოლოდ 6 დაბრუნდა. "6 მოთამაშიანი მაგიდა საკმაოდ სახალისო აღმოჩნდა, - ყვება ბელანდი, - მსგავსი ტიპის ტურნირებზე თამაშის გადაწყობა მთავარი ამოცანაა."

ჰედს-აპ დაპირისპირება ჟან-რობერ ბელანდსა და დინ ლაიალს შორის გაიმართა. ბელანდი მოწინააღმდეგეზე ორჯერ დიდ სტეკს ფლობდა, მაგრამ ორთაბრძოლა მაინც დაძაბული აღმოჩნდა. თამაში გარდამავალი უპირატესობით მიმდინარეობდა, თუმცა ზედიზედ 8 დარიგების მოგების შემდეგ, ჩიპების უმეტესი ნაწილი ბელანდის ხელში აღმოჩნდა. უკანასკნელ დარიგებაში, ლაიალი A3-ით ოლ ინ სიტუაციაში აღმოჩნდა, რასაც ბელანდმა QQ დაუპირისპირა. 3-იანების წყვილი ბრიტანელი მოთამაშისთვის არაფრისმომცემი იყო და ბელანდის QQ-ის დამარცხება ვერ შეძლო.