მაიკლ მიზრაქის ლეგენდა კიდევ უფრო დიდ სახელს იძენს - ებრაული წარმოშობის ამერიკელმა მოთამაშემ WSOP-ის მე-4 ოქროს სამაჯური მოიგო. რაც ყველაზე მთავარია, მიზრაქის ანგარიშზე უკვე Poker Players Championship-ის 3 ტიტულია.

PPC ლეგენდარული მოთამაშის, ჩიპ რიზის ხსოვნას ეძღვნება და, როგორც წესი, მასზე პოკერის სამყაროს ელიტა იყრის თავს. ტურნირის ბაი-ინი $50.000 დოლარს შეადგენს. მიზრაქიმ ივენთის მოგება ურთულეს ფინალურ მაგიდაზე შეძლო, სადაც მას ოპონირებას ისეთი მოთამაშეები უწევდნენ, როგორებიც მაიკ ლი, ბენი გლეიზერი და დენ სმიტი არიან. 

მაიკლ მიზრაქის კარიერაში უამრავი მნიშვნელოვანი მომენტია, WSOP-ის მეინ ივენთის ფინალური მაგიდიდან დაწყებული, 2011 წელს, WSOP Europe-ის ტურნირის მოგებით დასრულებული. მიუხედავად ამისა, განსაკუთრებულ აღნიშვნას ის ტურნირები იმსახურებენ, რომლებზე ასპარეზობამაც Grinder-ს უდიდესი აღიარება მოუტანა: 2010 და 2012 წლების Poker Players' Championship-ის მოგება, 2016 წელს ტურნირის მე-4 პოზიციაზე გასვლა, 2017 წელს იგივე ივენთზე 'ბაბლიდან' გამოვარდნა და ამჯერად კიდევ ერთი გამარჯვება, რომელსაც $1.239.126 დოლარიანი ანაზღაურება მოჰყვა. 

"ეს მართლაც დიდი მიღწევაა, - მოჩვენებითი თავმდაბლობა მიზრაქისთვის დამახასიათებელი არასდროს ყოფილა, - პირველი ღონისძიების მოგება არაჩვეულებრივი შეგრძნება იყო, მეორის - საუკეთესო, მესამე კი - წარმოუდგენელი რამ არის!"

ზემოთჩამოთვლილი მოთამაშეების გარდა, ტურნირზე ფილ აივი, ბრაიან რასტი და 2014 წლის ტურნირის ჩემპიონი - ჯონ ჰენიგანი თამაშობდნენ. სწორედ ლეგენდარულ ჰენიგანთან გამართული ჰედს-აპის შემდეგ მოიპოვა 'გრაინდერმა' მე-4 ოქროს სამაჯური.