29 წლის კანადელ პროფესიონალ მოთამაშეს არაჩვეულებრივი დრო უდგას - 2018 წლის იანვრის შემდეგ, სემ გრინვუდმა მე-3 ჰაი როლერ ივენთი მოიგო, ამჯერად $155.669 დოლარიანი ანაზღაურებით პირველი ადგილისთვის. 

მიუხედავად იმისა, რომ გრინვუდის კარიერა 2008 წელს იღებს სტარტს, 2015 წლამდე მისი საერთო მოგება $212.412 დოლარს შეადგენდა. 2015 წლის შემდეგ, ყოველწლიურად ის $2.000.000 დოლარზე მეტს იგებს. 2018 წლის განმავლობაში, მისმა შემოსავალმა $2.366.000 დოლარი შეადგინა. სულ რაღაც 2 კვირის წინ, გრინვუდმა PartyPoker-ის Live Millions-ის €50.000 ევროიანი ჰაი როლერი მოიგო, €1.000.000 ევროიანი ანაზღაურებით. 

მართალია გრინვუდს აშკარა აფსვინგის პერიოდი აქვს, მან მაინც ურთულეს ფინალურ მაგიდაზე მოახერხა გამარჯვების მოპოვება. WSOP-ის მეინ ივენთის ჩემპიონი - რაიან რისი, WSOP-ის ოქროს სამაჯურის მფლობელი - უილიამ გივენსი, Super High Roller Bowl-ის გამარჯვებული - რაინერ კემპე და ავსტრიელი ჰაი როლერი - თომას მიულოკერი - ყოველი მათგანი ნებისმიერი ტურნირის მოგებას ურთულეს ამოცანად აქცევს. უნდა ითქვას, რომ ფინალური მაგიდის 4 მოთამაშე სწორედ გრინვუდმა გამოთიშა ასპარეზობას.