პოკერი არამხოლოდ შემოსავლის წყარო, არამედ მეგობრული თამაშიცაა, რომლის გამართვაც ყველგანაა შესაძლებელი. ონლაინ პოკერის გარდა, რომელიც ინტერნეტში ითამაშება, არსებობს ლაივ პოკერის უამრავი სახეობა - საოჯახო თამაშიდან დაწყებული, კაზინოში გამართული რამდენიმედღიანი სატურნირო სერიით დამთავრებული. 

ადგილობრივმა მყვინთავმა, ვიტალ ბაზაროვმა აქაბის ყურეში ლაივ პოკერის კიდევ ერთი სახეობა აღმოაჩინა - წყალქვეშა პოკერი. "ჩვენ დაახლოებით 8 მეტრის სიღრმეზე ვიმყოფებოდით. მე და ჩემი მეგობარი წყალქვეშა ექსპედიციიდან ვბრუნდებოდით, როდესაც მყვინთავების ჯგუფს გადავეყარეთ" - ყვება ბაზაროვი. როგორც აღმოჩნდა, მყვინთავების ჯგუფს, რომლებსაც ბაზაროვი შეხვდა, 2.5 ატმოსფეროს პირობებში პოკერის ქეშ-გეიმ სესია ჰქონდათ გამართული. ბაზაროვმა აზარტული მეგობრების ჯგუფს მათი თამაშის გადაღებაზე ნებართვა სთხოვა, რაზეც დადებითი პასუხი მიიღო. აღსანიშნავია, რომ თამაში 5 კარტა სტადი იყო. 

"ისინი საკმაოდ გამოცდილი მყვინთავები იყვნენ, - ამბობს ბაზაროვი, - როგორც ხედავთ, წყლის ქვეშ პოკერის თამაში სრულიად შესაძლებელია, მაგრამ ამ დროს ძალიან მნიშვნელოვანია ჰაერის მარაგზე თვალყურის დევნება." ვიდეოში აღბეჭდილ წყალქვეშა სესიაში პოკერის სრული ტრადიციებია დაცული: ბანქო, ფული და სათვალე. ერთადერთი რამ, რაც გაუგებარი რჩება, ისაა თუ ვინ იყო თამაშში მონაწილეთაგან "ფიში" და ვინ "შარქი"?