სატურნირო მოგებების მიხედვით თუ ვიმსჯელებთ, დენიელ ნეგრანუ პოკერის ისტორიაში ყველაზე შემოსავლიანი მოთამაშეა. კარიერის განმავლობაში, კანადელმა პროფესიონალმა ათასობით ტურნირში მიიღო მონაწილეობა და საერთო ჯამში $36.546.094 დოლარი დააგროვა. როგორც ჩანს, პოკერის ლეგენდას საკმაოდ ამბიციური გეგმები აქვს.

სულ რაღაც 2 კვირის წინ, ნეგრანუ 'ტვიტერზე' იუწყებოდა, რომ ზაფხულში უამრავი ტურნირის თამაშს აპირებდა. 'უამრავის' ინტერპრეტირება და გაგება მრავალნაირადაა შესაძლებელი, მაგრამ $1.500.000 დოლარის ტურნირებში ჩადება მართლაც ამბიციურ გეგმებზე მეტყველებს. 

კანადელ მოთამაშეს ჯერჯერობით 39 ტურნირი აქვს შერჩეული. ნაკლებსავარაუდოა, რომ სიას კიდევ რომელიმე ღონისძიება დაემატოს. როგორც თავად განმარტავს, 39 ღონისძიებიდან ის მხოლოდ მნიშვნელოვან ტურნირებზე ითამაშებს და მხოლოდ ძირითადი ივენთებიდან გამოვარდნის შემდეგ გადაინაცვლებს ნაკლებადმნიშვნელოვან, მეორად ივენთებზე. რა თქმა უნდა, სათამაშოდ განსაზღვრული თანხის ძირითადი ნაწილი $1.000.000 დოლარიან Big One for One Drop-ის ივენთზე მოდის, რომელიც მსოფლიოში არსებულ ტურნირებს შორის ყველაზე ძვირადღირებულ ღონისძიებად ითვლება. 

გარდა One Drop-ისა, ნეგრანუს ლისტში რამდენიმე $25.000 და $50.000 დოლარიანი ჰაი როლერია მითითებული. რა თქმა უნდა, სიის ერთ-ერთ უმნიშვნელოვანეს ღონისძიებად $300.000 დოლარიანი Aria Super High Roller Bowl უნდა ჩაითვალოს.