პოკერის მოთამაშეების გარშემო უამრავი კითხვა ჩნდება - ბევრი მათგანი პირად ცხოვრებას განსაკუთრებულად უფრთხილდება; ზოგიერთი მათგანი რეპორტიორებისთვის ადვილად ხელმისაწვდომია; ზოგი სულაც ონლაინ პოკერ-რუმებში გავრცელებულ ზედმეტსახელსაა ამოფარებული და რეალური ვინაობის გაუმჟღავნებლად თამაშობს. უკანასკნელ პერიოდში, სოციალური ქსელებისა და სხვადასხვა მედია პლატფორმების განვითარება პოკერის სამყაროსაც შეეხო. შეიძლება ითქვას, რომ მსგავსმა პლატფორმებმა პოკერის გულშემატკივრები და პროფესიონალი მოთამაშეები მეტად დააახლოვა. 

წარსულში, პოკერის ყველაზე იდუმალი მოთმაშე, რომლის ვინაობის შესახებაც არავითარი ინფორმაცია არ არსებობდა, Isildur1 იყო. ერთადერთი სურათი, რომელიც ინტერნეტში გავრცელდა, იატაკზე მჯდომი, მონიტორს მიჩერებული Isildur1-ის ფოტო იყო, რომელიც არავინ იცოდა მართლაც მას ეკუთვნოდა, თუ 'ტროლების' მორიგი ხუმრობა იყო. ახლა კი, ყველასთვის ცნობილი ვიქტორ ბლომი 'ინსტაგრამზეა' ხელმისაწვდომი. ონლაინ პოკერის ლეგენდა დუბაიში იმყოფება და ამაყად პოზირებს ინტერნეტ ჰიტად ქცეულ შეფ-მზარეულთან.

'ინსტაგრამზე' პოკერის სამყაროს კიდევ ერთი საიდუმლო - ტომ დუანია ხელმისაწვდომი. კითხვები დუანის გარშემო ე.წ. Black Friday-ის შემდეგ გაჩნდა, როდესაც ახალგაზრდა მოთამაშე ცივილიზებული სამყაროდან აორთქლდა. მის გარშემო უამრავი შავ-ბნელი ჭორი ვრცელდებოდა, თუმცა, როგორც ჩანს, ის საკმაოდ კარგად ცხოვრობს, თავის მომავალ მეუღლესთან ერთად. მისი 'ინსტაგრამის' გვერდს სწორედ ასე ჰქვია - durrrrswife - 'დურრრრის' ცოლი. წყვილის ყოველდღიური ცხოვრება მათი 'ინსტაგრამის' გვერდზეა ხელმისაწვდომი. 

ონლაინ და ლაივ პოკერის კიდევ ორი ლეგენდა, რომლებმაც 'ინსტაგრამს' თავი ვერ აარიდეს, პატრიკ ანტონიუსი და გას ჰენსენია. როგორც ჩანს, პოკერის გულშემატკივრები ნოსტალგიის მოზღვავებას განიცდიან და სწორედ იმ მოთამაშეების გვერდებს აქცევენ ყურადღებას, რომლებმაც სათამაშო ინდუსტრია დიდი ხნის წინ დაიპყრეს.