გუშინ, პოკერის ინდუსტრიაში არსებული ერთ-ერთი ყველაზე მძიმე, არაკეთილსინდისიერი და უხერხული საიდუმლო გამჟღავნდა: iBas Media - პოკერის მოყვარულებისთვის უკეთ ცნობილი, როგორც PokerNews, The Stars Group-ის მფლობელობაში აღმოჩნდა - კომპანიისა, რომელიც PokerStars-ის ოფიციალური მესაკუთრეა. 

ოფიციალურად გაჟღერებული არასდროს ყოფილა, მაგრამ კულუარული ხმები და ჭორები იმის შესახებ, რომ PokerNews-ზე PokerStar-თან დაკავშირებული ინფორმაცია ზედმეტი ინტენსივობით იდებოდა, რამდენიმე წელია განხილვის აქტიურ საგანს წარმოადგენენ. ბევრი ისეთ ვარაუდსაც გამოთქვამდა, რომ Stars Group-ს მედია-პლატფორმაში მნიშვნელოვანი ინვესტიცია ჰქონდა ჩადებული, რის გამოც ონლაინ გაზეთი 'პოკერსტარსს' განსაკუთრებულ დროს უთმობდა. 

მრავალი წლის განმავლობაში დამალულ საიდუმლოს ფარდა iBas Media-ის კონფერენციაზე აეხადა, როდესაც კომპანიის წარმომადგენლებმა, საქმიანობის სფეროს გაფართოებაზე საუბრისას, იმ გარემოებას გაუსვეს ხაზი, რომ ამიერიდან, კომპანიის ოფიციალურ მფლობელზე, წარმომავლობასა და გამჭვირვალობაზე არანაირი კითხვები აღარ უნდა ყოფილიყო. 

PokerNews 2002 წელს, ლიტვური წარმოშობის ავსტრალიელი მოთამაშის, ბიზნესმენის, ფილანტროპისა და ამჟამად ევროპარლამენტარის, ანტანას გუოგას მიერ დაარსდა. პოკერის სამყაროში, მას Tony G-ის სახელით უკეთ იცნობენ. 2002 წელს, მან PokerNews-ის დომეინი სულ რაღაც $6.000 დოლარად იყიდა და მომავალ წლებში მედიაგიგანტად აქცია. როგორც გაირკვა, 2010 წლიდან მოყოლებული, ტონი ჯიმ ნელი ტემპით, მაგრამ სრულად გაყიდა თავისი წილი და ამჟამად საერთოდ ჩამოშორებულია კომპანიის საქმიანობას. 

iBas Media-ში აცხადებენ, რომ საიტი მაქსიმალურად ეცდება დარჩეს დამოუკიდებელი, ობიექტურად გააჟღეროს მოთამაშეების აზრები და ხელი შეუწყოს ონლაინ პოკერის განვითარებას, რაც, პირველ რიგში, მოთამაშეებისთვის აზრის გამოთქმის შესაძლებლობის მიცემას გულისხმობს. 

რა თქმა უნდა, PokerNews ერთ-ერთი საუკეთესო მედია-პლატფორმაა, რომელიც პოკერის მოყცარულებს მიმდინარე ტურნირების შესახებ რეალურ დროში აწვდის მაღალი ხარისხის ინფორმაციას; საიტზე მუშაობს უამრავი პროფესიონალი ჟურნალისტი და პოკერის ექსპერტი, რომლებიც მაღალი დონის თეორიულ ინფორმაციასა და ანალიტიკურ მასალას აქვეყნებენ, და მაინც, მიუხედავად ამისა, როგორც პოკერის თანამედროვე ონლაინ სამყარო აღნიშნავს, ბევრად ეთიკური იქნებოდა, PokerNews-ის მფლობელებზე განცხადება რეალურ დროში გაკეთებულიყო.