შესაძლოა, ფილ ჰელმუტს თანამედროვე პოკერის ყველაზე მოკრძალებული არ ეწოდოს, მაგრამ ტრაბახისა და ქედმაღლობის მიზეზები მას მრავლად აქვს: ერთ-ერთი საუკეთესო სატურნირო მაჩვენებელი პოკერის ისტორიაში, WSOP-ის 14 ოქროს სამაჯური, ერთ-ერთი საუკეთესო მაჩვენებელი ზოგადად პოკერის ისტორიაში, მრავალი ძვირადღირებული კონტრაქტი სათამაშო ინდუსტრიის გიგანტებთან და არამხოლოდ მათთან... 

ფილ ჰელმუტის კარიერული აფსვინგების ჩამოთვლა შორს წაგვიყვანს. ადვილი წარმოსადგენია ადამიანის გაბრაზება, რომელსაც მსგავსი რეზიუმე აქვს, მაშინ როდესაც მას ერთ-ერთი საუკეთესო მეგობარი საკმაოდ მკაცრად, შეიძლება ითქვას, უხეშადაც კი აკრიტიკებს. ერთ-ერთ ბოლო ინტერვიუში, დენიელ ნეგრანუმ მისი მეგობარი ილუზიებით გართობაში, უფრო კონკრეტულად რომ ვთქვათ, დელუზიურობაში დაადანაშაულა. კანადელმა მოთამაშემ ისეთ პერსონალიებზე ისაუბრა, როგორებიც ფედორ ჰოლცი, სტივ ო'დუაიერი და ჰაი როლერ ტურნირების სხვა აქტიური რეგულარები იყვნენ. 

"რამდენიმე წლის განმავლობაში, როცა მე ვისვენებდი, ეს ბიჭები ძალიან მძიმედ მუშაობდნენ საკუთარი თამაშის დახვეწაზე. ამ დროს კი, ფილ ჰელმუტი თვლის, რომ ის სხვა თანამედროვე მოთამაშეებს აღემატება. ეს უბრალოდ ილუზიაა, რეალობისგან სრულიად მოწყვეტილი."

ნეგრანუს ასეთ პოზიციაზე ფილ ჰელმუტს საკმაოდ მკაცრი პასუხი ჰქონდა: "პოკერის ისტორიაში მე საუკეთესო ROI მაჩვენებელი მაქვს. დიახ, მე ნამდვილად საუკეთესო ვარ და დიახ, რომელიღაც ჩვენგან აშკარად ილუზიებში ცხოვრობს. ფედორ ჰოლცი, შესაძლოა, საუკეთესო მოთამაშე გახდეს, მაგრამ ამისთვის 20 მოთამაშიანი ჰაი როლერ ტურნირის მოგება საკმარისი არაა, ამისთვის WSOP, WPT, EPT უნდა მოიგო."