რამდენიმე დღის წინ, ვეტერანმა ონლაინ გრაინდერმა და ჰედს-აპის ერთ-ერთმა საუკეთესო სპეციალისტმა, დაგ პოლკმა ლეგენდარულ ფილ ჰელმუტთან პოდკასტი ჩაწერა.

პოლკისა და ჰელმუტის დაახლოვების მიზეზი ბევრისთვის გაუგებარია - ისინი სხვადასხვა თაობის მოთამაშეები არიან; სრულიად განსხვავებული სტილებით თამაშობენ; ერთი მათგანი პოკერის ფსიქოლოგიისკენ იხრება, მეორე - მათემატიკისკენ; განსხვავებული დამოკიდებულება აქვთ ბანკროლ მენეჯმენტთან და რაც ყველაზე მთავარია: ფილ ჰელმუტის ეგოცენტრულობა ბევრისთვისაა ცნობილი, რის გამოც ის ხშირად ხდება კრიტიკის ობიექტი; მაშინ როცა დაგ პოლკი ერთ-ერთ რიგით მოთამაშედ მიიჩნევს თავს, რომელსაც, როგორც თავად ამბობს, უმართლებს ხოლმე. 

როგორც დაგ პოლკი ყვება, ფილ ჰელმუტის თამაშითა და პერსონით მას შემდეგ დაინტერესდა, რაც მის მიერ ნათამაშები ტურნირების გრაფიკები ნახა, რომელიც ჰელმუტის შთამბეჭდავ ვინრეიტზე მიუთითებდა: "ფილ ჰელმუტი უამრავ საყვედურს ღებულობს, რაც მისი 'ეგოს' წინააღმდეგ გამოთქმულ პრეტენზიებთანაა დაკავშირებული, მაგრამ ის გაცილებით მეტს იგებს, ვიდრე ეს მის კრიტიკოსებს წარმოუდგენიათ."

პოდკასტის მსვლელობისას წყვილმა ტომ დუანის გაუჩინერაბასა და დაგეგმილ გამოჩენაზე ისაუბრა.

- National Heads-up Poker Championship-ში ერთხელ შენ ტომს უთხარი, რომ 5 წლის შემდეგ ის აქ აღარ იქნებოდა. როგორი შეგრძნებაა, როცა მსგავსი წინასწარმეტყველება მართლდება? - ჰკითხა პოლკმა რესპონდენტს.

- მე ასე არ მითქვამს, - თავი იმართლა ჰელმუტმა, - მე ვთქვი: ვნახოთ თუ შენ კიდევ იქნები აქ? მიუხედავად ამისა, მე ის ვიგულისხმე, რაც შენ თქვი. რამდენად გამართლდა ჩემი მაშინდელი 'წინასწარმეტყველება', რთული სათქმელია. მართალია, დუანის ნახვა ტელეეკრანებზე ფაქტიურად შეუძლებელია, მაგრამ ის არანორმალურ ქეშ-გეიმებში ღებულობს მონაწილეობას და ერთ-ერთი ყველაზე წარმატებული მოთამაშეა პოკერის ისტორიაში. ტომთან საკმაოდ კარგი ურთიერთობა მაქვს. მის პრივატულ წვეულებაზე რამდენჯერმე მოვხვდი და ერთად კარგი დრო გავატარეთ. სხვათაშორის, სულ მინდოდა მეკითხა რა ხდება შენსა და ნეგრანუს შორის? მე ორივესთან ვმეგობრობ, მაგრამ ვერ გავიგე, რას უკავშირდება თქვენს შორის წარმოქმნილი დაპირისპირება?

- დენიელმა თქვა, რომ PokerStars-ის მიერ რეიკის (საკომისიოს) გაზრდა მოთამაშეებისთვის იქნებოდა კარგი. შემდეგ ყველაფერი შეცვალა და თქვა, რომ მსგავსი რამ მას არასდროს მოსვლია აზრად, თუმცა ზუსტად იგივე იდეის გამართლება სცადა. ეს არის და ეს, რის გამოც მე ნეგრანუს წინააღმდეგ გავილაშქრე.

- PokerStars-ზე რეიკის გაზრდა მხოლოდ იმ მოთამაშებისთვისაა კარგი, ვინც PokerStars-ის მიერ სპონსორდება, - სიცილით თქვა ჰელმუტმა, - საკომისიოს გაზრდა არასდროს იქნება თამაშისთვის უკეთესი. ეს სისულელეა!"

- ზუსტად იგივეს ვამტკიცებ მეც. სხვა პრობლემა მე მასთან არასდროს მქონია. გულახდილად რომ ვთქვა, ვთვლი, რომ შენ და ნეგრანუ ყველაზე ხმაურიანი მოთამაშეები ხართ, ვინც უკვე რამდენიმე ათწლეულია პოკერის პოპულარიზაციას ცდილობს, ხმამაღლა ლაპარაკობს ამაზე და ჯერ კიდევ არ დაღლილა თამაშით.

მოთამაშეებმა ასევე ილაპარაკეს განსხვავებაზე თანამედროვე გრაინდერებისა და ძველი თაობის მოთამაშეების განსხვავებაზეც.

- მგონია, რომ დღევანდელი მოთამაშეები, ვინც ონლაინ პოკერიდან მოვიდნენ, წარმოუდგენელ სტრატეგიებს იგონებენ - თქვა ჰელმუტმა, - მსგავსი დეტალური, კომპლექსური, მათემატიკურად გაანალიზებული ტაქტიკა წინა ეპოქებში არასდროს მინახავს. ამ ამბის ცუდი ნაწილი იმაში მდგომარეობს, რომ პოკერის მიმართ ძველი დამოკიდებულება თითქმის კვდება. არავის სიამოვნებს პოკერის მაგიდასთან ჯდომა მაშინ, როცა ჭკვიანი, სათვალეებიანი, მათემატიკური ნიჭის მქონე გენიოსი მას რამდენიმე წუთი აშტერდება და გადაწყვეტილებას მხოლოდ შემდეგ ღებულობს. One Drop-ის ტურნირზეც, მილიონერმა ბიზნესმენებმა, რომლებიც ტურნირის მონაწილეთა უმეტესს შეადგენდნენ, სწორედ ამ მიზეზით თქვეს უარი პროფესიონალ მოთამაშეებთან თამაშზე. ამის შემდეგ გახდა ეს ტურნირი ხელმისაწვდომი მხოლოდ მოყვარულებისა და ბიზნესმენებისთვის. ვფიქრობ, რომ ის, რასაც მე 'თეთრ მაგიას' ვეძახი, პოკერის ის სიხარული, რაც აზარტულ გადაწყვეტილებებს მოსდევს, თანდათან ქრება და ყველაფერი კომპიუტერულ და მექანიკურ აზროვნებაზე გადადის.

სულ მალე, დაგ პოლკი და ფილ ჰელმუტი ერთმანეთის წინააღმდეგ $50.000 დოლარიან ჰედს-აპ ტურნირს ითამაშებენ. მათ გარდა, ივენთში დენიელ ქეითსი და ფრენკ კასელა არიან ჩართულები. გამარჯვებულს $200.000 დოლარი შეხვდება წილად. მატჩი Poker Night In America-ს ფარგლებში გაიმართება.

პოდკასტის სრული ჩანაწერის ნახვა ქვემოთ მითითებულ ბმულზე შეგიძლიათ: