2017 წლის WSOP-ზე რუსმა მოთამაშეებმა საკმაოდ შთამბეჭდავი შედეგი აჩვენეს. პირველ რიგში, აღსანიშნავია ვლადიმერ შემელიოვის გამარჯვება, რომელმაც ომაჰას ტურნირის პირველი ადგილისთვის, WSOP-ის მეორე ოქროს სამაჯური მოიგო. ამ კვირაში კი რუსების წარმატება დიმიტრი იურასოვის მიერ მოგებული $10.000 დოლარიანი ულიმიტო ჰოლდემის 6-მაქს ივენთით აღინიშნა, რომელიც არამხოლოდ მონაწილეების სიმრავლით, არამედ პოკერის ცნობილი სახეებითაც გამოირჩეოდა. 

ღონისძიებაზე 332 მოთამაშე დარეგისტრირდა. საპრიზო ფონდმა $3.120.000 დოლარი შეადგინა. ფულში შესვლა ისეთმა მოთამაშეებმა მოახერხეს, როგორებიც კონორ დრინანი, დარიო სამარტინო, ერიკ ვასერსონი, სემ ტრიკეტი, რაინერ კემპე, ოლივიე ბუსკე და წლევანდელი WSOP-ის ოქროს სამაჯურის მფლობელი, ბენ იუ არიან. დიმიტრი იურასოვმა ფინალური მაგიდა 58 დარიგებაში დაასრულა, ხოლო გადამწყვეტი ჰედს-აპისთვის, სადაც ის დამაჯერებელი ჩიპლიდით შევიდა, სულ რაღაც 9 დარიგება დასჭირდა. რუსმა მოთამაშემ ამერიკელი ტომი ჩენი დაამარცხა და პირველ ოქროს სამაჯურთან ერთად, $775.923 დოლარი მოიგო. 

კიდევ ერთი რუსი მოთამაშე, რომლის პირველი ადგილის ანაზღაურებამაც ნახევარ მილიონ დოლარს გადააჭარბა, ნადარ კახმაზოვი გახდა. რუსმა გემბლერმა საკმაოდ რთული ფინალური მაგიდა ითამაშა: მის მოწინააღმდეგეებს შორის WSOP-ის სამაჯურის მფლობელი - სემ სოვერელი, 'ნოემბრის ცხრიანის' მონაწილე - კენი ჰალერტი და ჰაი როლერ ტურნირების რეგულარი - ფარაზ ჯაკა იყვნენ. კახმაზოვმა გადამწყვეტი დღე, ჩიპქაუნთის მიხედვით, მე-3 პოზიციიდან დაიწყო. 6 მოთამაშიან ფინალურ მაგიდაზე, კახმაზოვმა 'შავი საქმის' შესრულება სხვებს მიანდო. ის ჯერ კრისტიან რუდოლფის გამოვარდნას, ხოლო შემდეგ ჩიპლიდერის სტატუსით მყოფი ფარაზ ჯაკას ჩამოქვეითებას და გაგდებას დაელოდა. სემ სოვერელისა და კენი ჰალრტის გზიდან ჩამოშორების შემდეგ, რუსმა მოთამაშემ ფინალური ჰედს-აპი ამერიკელი კრის ჰანიკენის წინააღმდეგ მოიგო. "ძალიან ბედნიერი ვარ, - თქვა გამარჯვების შემდეგ კახმაზოვმა, - უკვე სამი წელია, რაც ამ შედეგის მიღწევას ვცდილობ, მაგრამ უშედეგოდ. ტურნირის გვიანდელ სტადიებზე 1-2 მნიშვნელოვან დარიგებას ვაგებ, რაც მიზნის მიღწევაში ხელს მიშლის. ამჯერად ყველაფერი გამომივიდა." ნადარ კახმაზოვმა, პირველი ადგილისთვის, $580.338 დოლარი მიიღო.