რამდენიმეთვიანი მოლოდინი, როგორც იქნა, დასრულდა! 26 ნოემბერს, კანადაში, ტორონტოს საერთაშორისო ფილმების ფესტივალზე, Bell Lightbox-ის კინოთეატრში, 'კიდპოკერის' პრემიერა გაიმართა. დოკუმენტური ფილმი, ლეგენდარული მოთამაშის, დენიელ ნეგრანუს ცხოვრებას შეეხება.

მას შემდეგ, რაც 2015 წლის ზაფხულში, პოკერის მოყვარულებს კინოსურათის ტრეილერის ნახვის შესაძლებლობა მიეცათ, ფილმის შესახებ მითქმა-მოთქმა არ შეწყვეტილა. პრემიერის დღემდე, თავად ნეგრანუსაც კი არ ჰქონდა ფილმის დასრულებული ვერსია ნანახი. 'კიდპოკერის' ცხოვრების კინოეკრანზე გადატანის იდეა Pokerstars-ს ეკუთვნის, რომელმაც გადაღებებისთვის ცნობილი რეჟისორი, ფრენსინ ვოტსონი დაიქირავა. ფილმი საშუალებას გვაძლევს ვნახოთ პოკერის ისტორიაში ერთ-ერთი ყველაზე წარმატებული მოთამაშის ცხოვრება კულისებს მიღმა, როგორ იზრდებოდა მომავალი ლეგენდა ტორონტოს ქუჩებში და როგორი იყო, 21 წლის ასაკში, მისი პირველი ნაბიჯები ვეგასის კაზინოებში. 

დენიელ ნეგრანუს აქამდეც ჰქონია შეხება დიდ ეკრანთან. მას ჰქონდა ეპიზოდური როლები ფილმებში: Lucky You - ერიკ ბანასა და რობერტ დუვალთან ერთად, The Grand - ვუდი ჰარელსონთან ერთად. მისი ხილვა X-Men-შიც კი არის შესაძლებელი. CTV News-ის ეთერში, როგორც ნეგრანუმ განაცხადა, თავდაპირველად მოკლემეტრაჟიანი სურათის გადაღება იგეგმებოდა, რომელიც 'პოკერსტარსის' სარეკლამო კამპანიის ნაწილი უნდა გამხდარიყო, მაგრამ გადაღებების მსვლელობაში ყველა დარწმუნდა, რომ 'კიდპოკერის' მასალით, სრულმეტრაჟიანი ფილმის გადაღება იყო შესაძლებელი. 

სატელევიზიო ეთერის შემდეგ, ნეგრანუს თაყვანისმცემლებს, Reddit-ის AskMeAnything-ში, საშუალება ჰქონდათ თავიანთი კუმირისთვის უამრავი კითხვა დაესვათ: დაწყებული - პოკერთან დაკავშირებული რჩევებიდან, დამთავრებული - პირადი ცხოვრებისეული დეტალებით. პუბლიკასთან აქტიური ურთიერთობის მხრივ, დღე აშკარად ნაყოფიერი აღმოჩნდა - 'რედიტის' შემდეგ, 'პოკერსტარსის' სახე უკვე მაიკლ ლენდსბურგის შოუს, Off The Road-ს ეწვია. 

KidPoker არ არის იმ ადამიანის ზედმეტსახელი, რომელმაც ტორონტო დიდი პოკერის სათამაშოდ დატოვა. ესაა ადამიანი, რომელმაც არნახულ წარმატებას და სიმაღლეებს მიაღწია, რომელმაც პოკერი უამრავ სხვადასხვა სუბკულტურაში შეიტანა და ფართო მასებისთვის ხელმისაწვდომ და საყვარელ გასართობად აქცია. დენიელ ნეგრანუ არამხოლოდ წარმატებული მოთამაშე, არამედ პოკერის ინდუსტრიისა და წრის აშკარა, გამოხატული ლიდერია. თუ როგორ მიაღწია ასეთ სიმაღლეებს რუმინული წარმოშობის კანადელმა მოთამაშემ, ამის შესახებ ფილმში შეიტყობთ, რომელიც მალე ფართო აუდიტორიისთვის იქნება ხელმისაწვდომი. 

მანამდე კი იხილეთ ფილმის ტრეილერი: